កម្ពុជាជាប់ចំណាត់ថ្នាក់លេខ១ក្នុងតំបន់អាស៊ានដែលមានធនធានយុវជនកើតក្នុងសម័យបច្ចេកវិទ្យាទំនើបច្រើនជាងគេ បើធៀបនឹងបណ្តាប្រទេសសមាជិកអាស៊ានផ្សេងទៀត។ នេះបើយោងតាមការចេញផ្សាយរបស់ស្ថាប័ន Seasia Stats ដោយផ្អែកលើទិន្នន័យរបស់អង្គការUNDPប្រចាំកម្ពុជា និងការិយាល័យស្ថិតិជាតិ។
Seasia stats៖ កម្ពុជាមានយុវជនកើតក្នុងសម័យឌីជីថលច្រើនជាងគេក្នុងតំបន់អាស៊ាន © Seasia stats
ក្នុងចំណោមប្រទេសអាស៊ានទាំង១០ កម្ពុជាមានប្រជាជនប្រមាណ ៦០% បានកើតក្នុងសម័យបច្ចេកវិទ្យាទំនើប ឬហៅថា Gen.z។ ប្រទេសភីលីពីនឈរនៅលេខរៀងទី២ ដែលចំនួនយុវជនប្រមាណ ៤៥% ចំណាត់ថ្នាក់លេខ៣ គឺឥណ្ឌូនេស៊ីដែលមានយុវជនកើតក្នុងសម័យទំនើបចំនួន ២៨% ម៉ាឡេស៊ីឈរនៅលេខ០៤ ថៃឈរនៅលេខ០៦ និងវៀតណាមឈរនៅលេខ០៦។ ចំណែកឡាវ ប្រ៊ុយណេ ភូមា សិង្ហបុរី និងប្រទេសទីម័រខាងកើតពុំមានតួលេខច្បាស់ការនៅឡើយទេ។ នេះបើតាមការអះអាងរបស់ស្ថាប័នស្ថិតិអាស៊ីអាគ្នេយ៍ហៅកាត់ថា Seasia Stats។
លោកបណ្ឌិត ឈត ប៊ុនថង ប្រធាននាយកដ្ឋាននៃវិទ្យាស្ថានទំនាក់ទំនងអន្តរជាតិនៃកម្ពុជាយល់ថា ការដែលកម្ពុជាមានចំនួនយុវជនកើតក្នុងសម័យបច្ចេកវិទ្យាទំនើបច្រើនជាទុនមួយសម្រាប់ជាតិ។ តែអ្វីដែលលោកបណ្ឌិតព្រួយបារម្ភ គឺខ្លាចយុវជនកម្ពុជាមិនអាចដើរទាន់នឹងបរិបទសង្គម និងការវិវត្តន៍ដ៏យ៉ាងឆាប់រហ័សនៃបច្ចេកវិទ្យាទំនើប។
តាមលោកបណ្ឌិត ឈត ប៊ុនថង ការពង្រឹងវិស័យអប់រំក្នុងស្រុកជារឿងមួយដែលចាំបាច់បំផុតសម្រាប់អភិវឌ្ឍន៍សមត្ថភាពរបស់យុវជននាយុគសម័យឌីជីថលនេះ។ តែអ្នកជំនាញផ្នែកទស្សនៈរូបនេះយល់ថា ថ្វីត្បិតប្រព័ន្ធអប់រំនៅកម្ពុជាមិនទាន់អាចប្រកួតប្រជែងជាមួយបណ្តាប្រទេសក្នុងតំបន់បានក៏ដោយក៏លោករំពឹងថា ទៅថ្ងៃខាងមុខ យុវជនខ្មែរនឹងមានចំណេះដឹងកាន់តែខ្លាំងលើផ្នែកបច្ចេកវិទ្យាឌីជីថល ការឆ្នៃប្រឌិត និងចំណេះជំនាញផ្សេងៗទៀត។
សូមជម្រាបថា ក្រុមមនុស្សដែលកើតក្នុងយុគសម័យឌីជីថល ឬហៅថា Gen.Z ជាក្រុមមនុស្សដែលកើតក្នុងចន្លោះឆ្នាំ១៩៩៧ ដល់ដើមឆ្នាំ២០១២។ ជារឿយៗ ពួកគេត្រូវបានអ្នកជំនាញហៅម្យ៉ាងទៀតថាជាជនជាតិដើមឌីជីថល ខណៈពួកគេក៏មានទំនោរយ៉ាងស្អិតរមួតនឹងបច្ចេកវិទ្យា រួមនឹងការបង្កើតកើតនូវគំនិតច្នៃប្រឌិតប្លែកៗផង៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
