ក្រសួងធនធានទឹក៖ កម្ពុជាប្រឈមនឹងអាកាសធាតុក្ដៅហើយស្ងួតពី ខែមីនា ដល់ ឧសភា
5-មីនា-2024
ក្រសួងធនធានទឹកនិងឧតុនិយម នៅថ្ងៃទី២ខែមីនា បានព្រមានពីការបន្តឡើងកម្ដៅសីតុណ្ហភាព នៅរវាងខែមីនាដល់ដើមខែឧសភាឆ្នាំ២០២៤។ បើតាមក្រសួងធនធានទឹក ការឡើងកម្ដៅនេះ ដោយសារកម្ពុជាបន្តរងបាតុភូតសកលអែលនីណូ(EI Nino)ខ្ពស់ជាង៧០ភាគរយ ចាប់ពីខែមីនាដល់ខែមេសា ហើយចាប់ពីខែឧសភាទៅបាតុភូតនេះនឹងថយចុះ២០ភាគរយ។
ក្រសួងធនធានទឹក៖កម្ពុជាប្រឈមនឹងអាកាសធាតុក្ដៅហើយស្ងួតពីខែមីនាដល់ឧសភា © Internet
បាតុភូត EI Nino ធ្វើខ្យល់ក្តៅ ទឹកក្តៅ បង្កឱ្យមានមហន្តរាយធម្មជាតិ និងផលវិបាកអាកាសធាតុខ្លាំង ដូចជាបានបង្កើនកម្តៅនៃភពផែនដី និងធ្វើឱ្យមានការប្រែបួលអាកាសធាតុខ្លាំងនៅតាមតំបន់ជាច្រើនមិនចំពោះតែកម្ពុជា។ ផលវិបាកនៃបាតុភូតអែលនីញ៉ូ នឹងធ្វើឱ្យមានភ្លៀងព្យុះកំណាច រាំងស្ងួតចម្លែក ប្តូររដូវ ប្តូរទម្លាប់អាកាសធាតុ។ កន្លែងខ្លះមានភ្លៀងច្រើនជ្រុល កន្លែងខ្លះកាន់តែរាំងស្ងួតខ្លាំង។
ឈរលើស្ថានភាពនេះ សម្រាប់រដូវប្រាំងក្នុងឆ្នាំ២០២៤នេះ ប្រទេសកម្ពុជាប្រឈមនឹងអាកាសធាតុក្ដៅហើយស្ងួតនាំឲ្យភ្លៀងកក់ខែធ្លាក់តិតជាងឆ្នាំ២០២៣ ។
នៅចំពោះមុខសីតុណ្ហភាពឡើងកំដៅដូច្នេះ ក្រសួងធនធានទឹក និងឧតុនិយម បានអំពាវនាវទៅអាជ្ញាធរដែនដី និងប្រជាពលរដ្ឋចូលរួមសហការប្រើប្រាស់ទឹកដោយសន្សំសំចៃក្នុងកម្រិតខ្ពស់ ជាពិសេសបណ្ដាជនបទដែលនៅឆ្ងាយពីប្រភពទឹក។ បើតាមក្រសួងធនធានទឹក អាកាសធាតុក្ដៅហើយស្ងួតនេះនាំឲ្យកើតមានបាតុភូតផ្គររន្ទះ និងខ្យល់កន្ទ្រាក់ ដែលអាចកើតមានច្រើននៅក្នុងខែមេសា និងខែឧសភា។
លោក ចាន់ យុត្ថា អ្នកនាំពាក្យក្រសួងធនធានទឹកបានថ្លែងប្រាប់វិទ្យុបារាំងអន្តរជាតិនៅថ្ងៃទី៣ ខែមីនា នេះថា ប្រឈមនឹងបាតុភូតសកលអែលនីណូ(EI Nino)កម្ពុជានឹងរងកម្ដៅកម្រិត៤១អង្សាសេ ក្នុងខែមេសាខាងមុខ។ បើតាមអ្នកនាំពាក្យដដែល ការឡើងកម្ដៅនេះ ធ្វើឲ្យប្រឈមនឹងស្ថានភាពក្ដៅហួតហែង ហើយខ្យល់កន្ទ្រាក់ ផ្គរ រន្ទះនឹងកើតឡើងព្រមគ្នា។
ដោយឡែកនៅក្នុងសប្ដាហ៍ទី១ នៃមីនានេះ អាចនឹងកើតមានភ្លៀងកក់ខែនៅតំបន់មាត់សមុទ្រ ហើយចូលដល់សប្ដាហ៍ទី២ ក្នុងខែដដែលនេះ អាចនឹងមានភ្លៀងកក់ខែតិចតួចនៅតំបន់ទំនាបកណ្ដាលភាគពាយ័ព្យស្ថិតក្នុងខេត្តបាត់ដំបង និងបន្ទាយមានជ័យ។
ទោះបីជាបាតុភូតសកល តែគេមើលឃើញថា អ្នករងផលប៉ះពាល់ដោយផ្ទាល់ពីអាកាសធាតុក្ដៅហើយស្ងួតគឺប្រជាកសិករប្រកបរបរកសិកម្មដែលធ្វើស្រែប្រវាស់មេឃ និងពលរដ្ឋភាគច្រើនដែលរស់នៅជាយក្រុងប្រឈមនឹងការខ្វះប្រើប្រាស់រៀងរដូវវស្សា។
ប៉ុន្តែយ៉ាងណាមិញ លោក ចាន់ យុត្ថា បានគូសបញ្ជក់ថា ក្រសួងត្រៀមទឹកសម្រាប់ប្រើប្រាស់ក្នុងការដាំដុះស្រូវប្រាំង និងទឹកសម្រាប់ប្រើប្រាស់នាពេលខាងមុខ ជាពិសេសសម្រាប់ខេត្តពោធិ៍សាត់ដែលអាចប្រឈមនឹងការខ្វះទឹកប្រើប្រាស់។ ជាការជួយសង្គ្រោះធ្វើឡើងក្រោមទម្រង់បញ្ចូនទឹកតាមប្រឡាយមេធំៗទៅកាន់ឃុំដែលប្រឈមនឹងការគ្មានទឹក៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
