គ.ជ.ប និងអ្នកនយោបាយចាត់ទុកការបោះឆ្នោតព្រឹទ្ធសភាដំណើរការរលូនគ្មានឧបសគ្គរាំងស្ទះ
26-កុម្ភៈ-2024
លោក ហ្សង ពុទ្ធា អ្នកនាំពាក្យ គ.ជ.ប បានគូសបញ្ជាក់ប្រាប់វិទ្យុបារាំងអន្តរជាតិRFI ក្រោយដំណើរការបោះឆ្នោតព្រឹទ្ធសភាទី៥បិទបញ្ចប់ថា ដំណើរការបោះឆ្នោតព្រឹទ្ធសភានីតិកាលទី៥ នៅព្រឹកថ្ងៃទី២៥ ខែកុម្ភៈ នេះ ប្រព្រឹត្តទៅដោយរលូនពោលគឺគ្មានឧបសគ្គ ឬ អំពើហិង្សាអ្វីកើតឡើងទេ។
លោក ហ្សង ពុទ្ធា បានអះអាងទៀតថា ស្ថានភាពជារួមអំឡុងពេលបោះឆ្នោត និងអំឡុងពេលរាប់សន្លឹកឆ្នោតមានភាពល្អប្រសើរ។ ល្អប្រសើរនៅត្រង់ថា អង្គបោះឆ្នោតបំពេញតួនាទីត្រឹមត្រូវនិងមានភាពចាស់ទុំផ្នែកនយោបាយ ហើយអាជ្ញាធរក៏បំពេញតួនាទីបានល្អប្រសើរក្នុងការថែរក្សាសុខសុវត្ថិភាពជូនអង្គបោះឆ្នោតទាំងអស់គ្នាសរុប១១,៧៤៧នាក់។ អង្គបោះឆ្នោត១១,៧៤៧នាក់នេះជាអ្នកតំណាងរាស្ត្រនៅក្នុងតំណែងនិងក្រុមប្រឹក្សាឃុំសង្កាត់នៅក្នុងតំណែង។
លោក ហ្សង ពុទ្ធា ចាត់ទុកដំណើរការបោះឆ្នោតនៅក្នុងអាណត្តិទី៥ កាន់តែមានភាពល្អប្រសើរបើធៀប៤អាណត្តិមុន ហើយអង្គបោះឆ្នោតកាន់តែមានភាពចាស់ទុំ យកចិត្តទុកដាក់ និងមានភាពសស្រាក់សស្រាំក្នុងការទៅបោះឆ្នោត។
លោក រ៉ុង ឈុន ទីប្រឹក្សាគណបក្សកម្លាំងជាតិ ដែលបានចុះសង្កេតការណ៍នៅមណ្ឌលភូមិភាគ៣ នាមជ្ឈមណ្ឌលគរុកោសល្យភូមិភាគខេត្តកណ្ដាលសង្កេតឃើញថា ដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ប្រព្រឹត្តទៅដោយរលូន និងមានដំណើរការល្អ ហើយការរៀបចំមានសណ្ដាប់ធ្នាប់ របៀបរៀបរយ និងល្អប្រសើរ។
គួរជម្រាបជូនថា ការបោះឆ្នោតព្រឹទ្ធសភានីតិកាលទី៥ មានការិយាល័យចំនួន៣៣ និង៨មណ្ឌល។ ការបោះឆ្នោតព្រឹទ្ធសភានេះ មានគណបក្ស៤ ចូលរួមប្រកួតប្រជែងគ្នា ក្នុងនោះគណបក្សប្រជាជនកម្ពុជា គណ បក្សហ៊្វុនស៊ិនប៉ិច គណបក្សភ្លើងទៀន និងគណបក្សកម្លាំងជាតិ។
លោក រ៉ុង ឈុន ចាត់ទុកការបោះឆ្នោតព្រឹទ្ធសភាបែបអសកលនេះ មានសារៈសំខាន់ណាស់ សម្រាប់ស្ថាប័នកំពូលរបស់ជាតិ។ លោក ហ្សង ពុទ្ធា បន្ថែមថា ការបោះឆ្នោតព្រឹទ្ធសភា គឺជាការបោះឆ្នោតជ្រើសរើសរចនាសម្ព័ន្ធថ្មីបន្ថែមទៀតក្រៅពីរចនាសម្ព័ន្ធរដ្ឋសភាដែលមានស្រាប់។ តួនាទីរបស់ព្រឹទ្ធសភាជាអង្គនីតិប្បញ្ញត្តិត្រួតពិនិត្យទ្វេដង ដើម្បីអនុម័តលើការសម្រេចរបស់ថ្នាក់ក្រោម។
កម្ពុជារៀបចំបោះឆ្នោតព្រឹទ្ធសភានៅក្នុងឆ្នាំ២០០៦ បន្ទាប់ពីឆ្នាំ១៩៩៦ មានការចាត់តាំង ក្រោយកិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ តុលា ឆ្នាំ១៩៩៣។ កាលណោះកម្ពុជាមានសភាធម្មនុញ្ញតែបានក្លាយមកជារដ្ឋសភាហើយរដ្ឋសភាបានដើរតួនាទីជារៀបចំឲ្យមានរចនាសម្ព័ន្ធមួយបន្ថែមទៀតគឺព្រឹទ្ធសភា៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
