ជប៉ុន ធ្លាក់ចំណាត់ថ្នាក់លែងជាមហាអំណាចសេដ្ឋកិច្ចទីបីពិភពលោក
16-កុម្ភៈ-2024
ក្រោមឥទ្ធិពលនៃការធ្លាក់ចុះតម្លៃប្រាក់យេន និងអតិផរណា ជប៉ុនបានបាត់បង់នាមជាមហាអំណាចសេដ្ឋកិច្ចពិភពលោកលំដាប់ទីបី ដោយត្រូវបានអាល្លឺម៉ង់វ៉ារឈ្នះនៅឆ្នាំ២០២៣នេះ។ នេះបើយោងតាមទិន្នន័យបឋមស្តីពី ផលិតផលសរុបក្នុងស្រុកជប៉ុន ចេញផ្សាយនៅថ្ងៃព្រហស្បតិ៍ ទី១៥ កុម្ភៈ ២០២៤។ កាលពីឆ្នាំ២០១០ ចិនបានវ៉ារឈ្នះជប៉ុនយកតំណែងជាមហាអំណាចសេដ្ឋកិច្ចលំដាប់ទីពីរ។
ជប៉ុន បានធ្លាក់ពីតារាងកិត្តិយស។ នាមជាមហាអំណាចសេដ្ឋកិច្ចពិភពលោកលំដាប់ទីបី ត្រូវបានអាល្លឺម៉ង់ដណ្តើមយកនៅឆ្នាំ២០២៣ ព្រោះផលិតផលក្នុងស្រុកជប៉ុនប្រចាំឆ្នាំ (ដោយគ្មានការតម្រែតម្រឹមនឹងអតិផរណា) មានទំហំ ៤២០០ពាន់លានដុល្លារ ទល់នឹង៤៥០០ពាន់លាន សម្រាប់អាល្លឺម៉ង់។ ប៉ុន្តែដោយជាក់ស្តែងនោះ ផលិតផលសរុបក្នុងស្រុកជប៉ុន បានកើនឡើងដល់ទៅ ១,៩% នៅឆ្នាំមុនទល់នឹង ១,២% កាលពីឆ្នាំ២០២២ ឯអាល្លឺម៉ង់វិញសេដ្ឋកិច្ចបានថយ ០,៣%។ នេះបើតាមរបាយការណ៍ផ្លូវការចេញផ្សាយកាលពីខែមករា។
ដូច្នេះមានន័យថា អាល្លឺម៉ង់ជើងឯកអឺរ៉ុបផ្នែកនាំចេញ ដែលកំពុងត្រដរជំនះវិបត្តិអតិផរណា ដែលតម្លៃថាមពលឡើងថ្លៃ មានសេចក្តីត្រូវការក្នុងស្រុកទាប បានក្លាយជាមហាអំណាចសេដ្ឋកិច្ចទីបីដូចការព្យាកររបស់អង្គការមូលនិធិរូបិយវត្ថុអន្តរជាតិកាលពីខែតុលា ២០២៣ ដោយគ្រាន់តែជាការបន្លំភ្នែកមួយភ្លែតប៉ុណ្ណោះ។ ម្យ៉ាងទៀតមិនយូរទេ ឥណ្ឌានឹងអាចវ៉ារឈ្នះទាំងអាល្លឺម៉ង់ និងជប៉ុនតែម្តង។ បើតាមអ្នកជំនាញសេដ្ឋកិច្ចចាប់ពីឆ្នាំ២០២៥ ទៅឥណ្ឌាដែលមានប្រជាពលរដ្ឋច្រើនជាងគេនៅលើពិភពលោក នឹងមានផលិតផលសរុបក្នុងស្រុកលើសប្រទេសទាំងពីរ បើទោះបីជាកំរិតជីវភាពពលរដ្ឋម្នាក់ៗទាបជាងពលរដ្ឋនៅអាល្លឺម៉ង់ និងជប៉ុនក៏ដោយ។
បើតាមសារព័ត៌មានក្នុងស្រុក ជប៉ុនបាត់បង់ចំណាត់ថ្នាក់ ដោយហេតុតែប្រាក់យេនធ្លាក់ថ្លៃខ្លាំង អត្រាពលរដ្ឋក៏ធ្លាក់ចុះ ហើយមានផលិតកម្មទាបអូសបន្លាយ។ តាំងពីចិនវ៉ារយកចំណាត់ថ្នាក់ទីពីរ នៅឆ្នាំ២០១០ មក ជប៉ុនគ្មានធ្វើអ្វីដើម្បីបង្កើនសក្តានុពលកំណើនសេដ្ឋកិច្ចទេ។ នេះបើតាមកាសែតNikkei។
ដូចអាល្លឺម៉ង់ ជប៉ុនជាប្រទេសមហាអំណាចឧស្សាហកម្ម និងនាំចេញ តែកំពុងបាត់បង់ស្ថានភាពយ៉ាងលឿនរហ័ស ហើយសេចក្តីត្រូវការក្នុងស្រុកត្រូវរងសម្ពាធដោយបញ្ហាអតិផរណា និងលុយថោក។ តាំងពីពាក់កណ្តាលឆ្នាំ២០២៣មក កំណើនសេដ្ឋកិច្ចជប៉ុនបានថយចុះ ០,៨% នៅរវាងពីខែកក្កដា ដល់ខែកញ្ញា និង០,១%នៅត្រីមាសទីបួន។ ដូច្នេះតាមបច្ចេកទេសជប៉ុនបានធ្លាក់ក្នុងវិបត្តិសេដ្ឋកិច្ចដើរថយក្រោយ។ ស្ថានភាពសេដ្ឋកិច្ចអាប់អួរនេះ អាចនឹងបង្កភាពស្មុគស្មាញដល់ធនាគារកណ្តាលជប៉ុនដែលចង់ចាប់ផ្តើមបញ្ចប់នយោបាយរូបិយវត្ថុដ៏មហាសម្របសម្រួលរបស់ខ្លួន នៅដើមឆ្នាំនេះ។ ជាដំណើរការដ៏សន្សឹមៗបំផុត ព្រោះធនាគារកណ្តាលជប៉ុនមិនចង់ឱ្យសេដ្ឋកិច្ចប្រទេស និងទីផ្សារភាគហ៊ុនរំជើបរំជួលទេ។ បើតាមមូលនិធិរូបិយវត្ថុអន្តរជាតិជប៉ុននឹងមានកំណើនសេដ្ឋកិច្ចគួរសមល្មម (០,៩%) នៅឆ្នាំ២០២៤៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
