លោកនាយករដ្ឋមន្ត្រី ហ៊ុន ម៉ាណែត នឹងធ្វើទស្សនកិច្ចជាផ្លូវការទៅកាន់ប្រទេសថៃនៅថ្ងៃទី០៧ ខែកុម្ភៈ ឆ្នាំ២០២៤។ ក្រសួងការបរទេសកម្ពុជាប្រកាសថា ទស្សនកិច្ចរបស់លោក ហ៊ុន ម៉ាណែត នៅថៃគឺផ្តោតទៅលើការពង្រឹងទំនាក់ទំនងយូរអង្វែង និងចំណងមិត្តភាពជាប្រពៃណីរវាងប្រទេសទាំងពីរ។ ក៏ប៉ុន្តែមន្ត្រីផ្លូវការថៃបានប្រាប់កាសែតថៃថា មេដឹកនាំ ថៃ-កម្ពុជា មានរបៀបវារៈជាច្រើនត្រូវជជែកគ្នាដូចជាបញ្ហាសេដ្ឋកិច្ចតាមព្រំដែន ពាណិជ្ជកម្ម វិនិយោគ ការតភ្ជាប់គមនាគមន៍ និងទេសចរណ៍ជាដើម។
នៅក្នុងសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីថ្ងៃចន្ទទី ០៥ ខែកុម្ភៈ ឆ្នាំ២០២៤ លោកនាយករដ្ឋមន្ត្រី ហ៊ុន ម៉ាណែត នឹងជួបពិភាក្សាគ្នាទ្វេភាគីជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន ជុំវិញកិច្ចសហប្រតិបត្តិការទ្វេភាគី និងពហុភាគី ដែលផ្តល់ផលប្រយោជន៍ទៅវិញទៅមកអំឡុងពេលទស្សនកិច្ចរបស់លោក ម៉ាណែត នៅក្នុងប្រទេសថៃ។ លើសពីនេះក៏មានពិធីចុះហត្ថលេខាលើឯកសារស្តីពី កិច្ចសហប្រតិបត្តិការទ្វេភាគីមួយចំនួនដែរ។
ក៏ប៉ុន្តែអ្នកនាំពាក្យនៃទីស្តី ការនាយករដ្ឋមន្ត្រីថៃលោក ឆៃ វ៉ាត់ឆារ៉ុង បានប្រាប់កាសែត The Nation របស់ថៃផ្សាយជាភាសាអង់គ្លេសថានាយករដ្ឋមន្ត្រីកម្ពុជា-ថៃ នឹងជួបពិភាក្សាគ្នាស្តីពី ការអភិវឌ្ឍន៍សេដ្ឋកិច្ចតាមព្រំដែន ការជំរុញពាណិជ្ជកម្ម ការវិនិយោគ ការលើកកម្ពស់ការតភ្ជាប់នៃវិស័យដឹកជញ្ជូន និងការជំរុញទេសចរណ៍នៃប្រទេសទាំងពីរ។
ក្រៅពីនេះ ដំណើរទស្សនកិច្ចដំបូងរបស់នាយករដ្ឋមន្ត្រីខ្មែរនៅថៃបន្ទាប់ពីលោកឡើងកាន់អំណាចអស់រយៈពេលជាង៥ខែ ត្រូវគេរំពឹងថានឹងលើករឿងផលប្រយោជន៍នៃតំបន់ត្រួតស៊ីគ្នានៅក្នុងសមុទ្រទំហំ ២៦ ០០០គីឡូម៉ែត្រការ៉េ ដែលសំបូរដោយធនធានធម្មជាតិ រ៉ែ និងថាមពលទៅជជែកគ្នា។ ការបំពុលខ្យល់ក៏ជារបៀបវារៈដែលបានគ្រោងទុកផងដែរ។ នេះបើតាមការលើកឡើងពីនាយករដ្ឋមន្ត្រីថៃកាលពីខែមុន។
សូមរំលឹកថា កម្ពុជា-ថៃ ជាប្រទេសជិតខាងគ្នា តែងមានទំនាក់ទំនងគ្នាយ៉ាងជិតស្និទ្ធផ្នែកសេដ្ឋកិច្ច ពាណិជ្ជកម្ម ទេសចរណ៍ និងការងារ។ ទំហំពាណិជ្ជកម្មកម្ពុជា-ថៃ ឆ្នាំ២០២៣ មានជិត ៤ពាន់លានដុល្លារ។ ពលករទេសន្តរប្រវេសន៍ខ្មែរចូលទៅបំរើការងារនៅក្នុងប្រទេសថៃមានប្រមាណ ១,២លាននាក់ ខណៈទេសចរថៃជិត ២លាននាក់ បានចូលមកកម្ពុជាកាលពីឆ្នាំទៅ៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
