OCDE៖ ២០២៤ មានកំណើនសេដ្ឋកិច្ចប្រសើរ តែព្រមានពីហានិភ័យនៅសមុទ្ទក្រហម
6-កុម្ភៈ-2024
អង្គការសហប្រតិបត្តិការ និងអភិវឌ្ឍសេដ្ឋកិច្ចOCDEមានសុទិដ្ឋនិយមជាងមុន។ នៅក្នុងការព្យាករចេញផ្សាយនៅថ្ងៃចន្ទ ទី៥ កុម្ភៈនេះ ពិភពលោកនឹងមានកំណើនសេដ្ឋកិច្ចឆ្នាំ២០២៤ ប្រសើរជាងការព្យាករលើកមុន។ ប៉ុន្តែបើតាមអង្គការដដែល ស្ថានភាពប្រសើរនេះមានលាក់នូវហានិភ័យ ដែលអាចជំរុញឱ្យមានអតិផរណាហក់ឡើងវិញនោះ គឺភាពតានតឹងនៅសមុទ្ទក្រហមបង្កឡើងដោយពួកឧទ្ទាមហ៊ូទីយេម៉ែន។
OCDE៖ ២០២៤មានកំណើនសេដ្ឋកិច្ចប្រសើរ តែព្រមានពីហានិភ័យនៅសមុទ្ទក្រហម Pixabay/Minka2507
បើគ្មានវិបត្តិភូមិសាស្ត្រនយោបាយណាផុសឡើងដោយឥតព្រៀងទុកទេ សេដ្ឋកិច្ចពិភពលោកសម្រាប់ឆ្នាំ២០២៤ នឹងមានកំណើនខ្លាំងកា្លជាងការព្យាករមុន ពោលគឺផលិតផលសរុបពិភពលោកនឹងកើន២,៩% មិនមែនត្រឹម២,៧% ដូចការសន្និដ្ឋានកាលពីខែវិច្ឆិកាទេ។
កំណើនសេដ្ឋកិច្ចពិភពលោកបានប្រសើរដោយសារម៉ាស៊ីនសេដ្ឋកិច្ចសហរដ្ឋអាមេរិក ជួយអូសទាញ។ ការចាយវាយ ភាពរឹងមាំនៃទីផ្សារការងារបានពង្រឹងកំណើនសេដ្ឋកិច្ចអាមេរិក ដោយនៅឆ្នាំនេះ ផលិតផលសរុបអាមេរិកនឹងកើនឡើង២,១% ទល់នឹង១,៥% ប៉ុណ្ណោះនៅក្នុងការព្យាករមុន។
ប៉ុន្តែជាមួយនឹងសុទិដ្ឋនិយម អង្គការសហប្រតិបត្តិការ និងអភិវឌ្ឍសេដ្ឋកិច្ចកំពុងទាញសញ្ញាអាសន្ន និងតាមដានដោយព្រួយបារម្ភបំផុតស្ថានភាពនៅសមុទ្ទក្រហមដែលជាច្រកផ្លូវពាណិជ្ជកម្ម(១២%) ដ៏ចម្បងមួយនៅលើពិភពលោក។
តាំងពីពាក់កណ្តាលខែវិច្ឆិកា ២០២៣មក ដោយហេតុតែការវាយប្រហាររបស់ពួកឧទ្ទាមហ៊ូទីយេម៉ែន ចរាចរណ៍ដឹកជញ្ជូនតាមច្រកសមុទ្ទក្រហម បានធ្លាក់ចុះអស់ជិត៣០% បើគិតក្នុងរយៈពេលមួយឆ្នាំ។ នេះបើតាមតួលេខរបស់មូលនិធិរូបិយវត្ថុ។ ដើម្បីធានាសុវត្ថិភាព នាវាដឹកទំនិញត្រូវបើកវាងទ្វីបខាងអាហ្វ្រិក។ ជាក់ស្តែង ក្រុមហ៊ុនដឹកជញ្ជូនCMA-CGM បានប្រកាសកាលពីថ្ងៃសុក្រ ឈប់បើកទូកឆ្លងកាត់សមុទ្ទក្រហម។ ដំណើរផ្លូវនេះកាន់តែឆ្ងាយ អស់សោហ៊ុយកាន់ច្រើន ដូច្នេះវាច្បាស់ប៉ះពាល់ដល់តម្លៃទំនិញ។ បើស្ថានភាពនៅតែបន្តដូច្នេះ តម្លៃដឹកជញ្ជូននឹងបំប៉ោងឱ្យមានអតិផរណានៅឆ្នាំ២០២៤ ក្នុងកំរិត០,៤%ក្នុងមួយឆ្នាំ នៅតាមបណ្តាប្រទេសជឿនលឿន។ នេះបើតាមរបាយការណ៍ប្រចាំត្រីមាសរបស់OCDEដដែល ដែលរំលឹកថា ពិភពលោកអាចរកឃើញកំណើនសេដ្ឋកិច្ចវិញដោយសារតែលែងសូវមានអតិផរណាទំនិញ បូកនឹងអត្រាការប្រាក់ចុះ ទើបសេដ្ឋកិច្ចអាចចាប់មានកំណើនឡើងវិញជានិរន្តរ៍បាន។ ជម្លោះនៅដើមបូព៌ារវាងអ៊ីស្រាអែល និងចលនាហាម៉ាសប៉ាឡេស្ទីន ជាហានិភ័យមួយទៀតដែលអង្គការសហប្រតិបត្តិការសេដ្ឋកិច្ច និងអភិវឌ្ឍព្រមានថារាល់ការធ្លាក់ដុនដាបនៃស្ថានភាពនៅតំបន់នេះ នឹងបំផ្លាញកំណើនសេដ្ឋកិច្ចពិភពលោកភ្លាម។
សម្រាប់តំបន់អឺរ៉ូ នាំមុខដោយបារាំង និងអាល្លឺម៉ង់វិញ OCDEព្យាករឃើញមានកំណើនទាបជាងរបាយការណ៍ខែវិច្ឆិកាទេ។ ផ្ទុយទៅវិញ អង្គការបានរក្សាក្តីរពឹងដដែលសម្រាប់កំណើនសេដ្ឋកិច្ចនៅអង់គ្លេស ០,៧% នៅចិន៤,៧% និង១%សម្រាប់ជប៉ុន។ តែកំណើនព្យាករឡើងដល់១,៨%សម្រាប់រុស្ស៊ី៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
