ធ្លាប់ជាប្រទេសមានប្រជាជនច្រើនជាងគេនៅលើពិភពលោក អស់ជាយូរឆ្នាំ ចិនបាន និងកំពុងជួបវិបត្តិប្រជាសាស្ត្រកាន់ខ្លាំង។ បន្ទាប់ពីមានកំណើនប្រជាជនអស់ពេលជាង៦០ឆ្នាំ ជាប់គ្នា ចំនួនពលរដ្ឋចិនបានធ្លាក់ចុះជាលើកទីមួយនៅឆ្នាំ២០២២។ ហើយនៅឆ្នាំ២០២៣នេះ ការធ្លាក់ចុះមានល្បឿនកាន់តែខ្លាំង និងកាន់តែលឿន។
បើតាមអង្គការសហប្រជាជាតិ ឥណ្ឌាបានវ៉ារឈ្នះចិនក្លាយជាប្រទេសមានពលរដ្ឋច្រើនជាងគេនៅលើពិភពលោក កាលពីឆ្នាំទៅ។ ឯចិនត្រូវបន្តមានចំនួនប្រជាពលរដ្ឋថយចុះជាលំដាប់នៅជាច្រើនទសវត្សរ៍ខាងមុខទៀត។ គិតត្រឹមចុងឆ្នាំ២០២៣ ចំនួនពលរដ្ឋចិន(សញ្ជាតិចិនរស់នៅក្នុងប្រទេសចិនជាដែនទ្វីប ដោយមិនរាប់បញ្ជូលជនជាតិចិនរស់នៅតំបន់ពាក់កណ្តាលស្វ័យត ហុងកុង និងម៉ាកាវ) បានធ្លាក់មកនៅត្រឹមជាង១ពាន់បួនរយលាននាក់ប៉ុណ្ណោះ (១,៤០៩៦៧ពាន់លាននាក់) ពោលគឺ ទាបជាងឆ្នាំ២០២២ ដល់ទៅជាង ២លាននាក់។ ជាការធ្លាក់ខ្លាំង ដល់ជាងពីរដងច្រើនជាងឆ្នាំ២០២២ទៅទៀត។ នេះបើតាមសេចក្តីប្រកាសរបស់ការិយាល័យស្ថិតិជាតិនៅថ្ងៃពុធ ទី១៧ មករា ២០២៤ ដោយរំលឹកថា កាលពីឆ្នាំ២០២២ ចំនួនប្រជាពលរដ្ឋចិនបានធ្លាក់ចុះ ជាលើកទីមួយគិតចាប់ពីឆ្នាំ១៩៦០ អស់៨៥០០០០នាក់។ ចំណែកអត្រាកំណើតវិញក៏ធ្លាក់ចុះដែរ នៅឆ្នាំ២០២៣នេះ ដោយមានកំណើតក្មេងតែជាង ៩លាននាក់បន្តិចប៉ុណ្ណោះ ទល់នឹងជាង៩លាន៥សែននាក់ កាលពីឆ្នាំ២០២២។
ហេតុអ្វីបានជាដូច្នេះ? នៅក្នុងទសវត្សរ៍ឆ្នាំ១៩៦០ ស្រ្តីចិនម្នាក់មានកូនជាមធ្យមជាង៧នាក់ ប៉ុន្តែនៅឆ្នាំ២០២២ ស្ត្រីម្នាក់មានកូនតែ១,០៥នាក់ ជាមធ្យមតែប៉ុណ្ណោះ។ បើតាមអ្នកជំនាញប្រជាសាស្ត្រឯករាជ្យ He Yafu តម្លៃសិក្សាអប់រំដ៏ខ្ពស់របស់កូន ទំនុកចិត្តរបស់ក្មេងជំនាន់ក្រោយលើប្រព័ន្ធអាពាហ៍ពិពាហ៍ដែលជាលក្ខខណ្ឌចាំបាច់មុននឹងមានកូន ជាមូលហេតុចំបងនាំឱ្យអត្រាកំណើត និងចំនួនប្រជាពលរដ្ឋធ្លាក់ចុះ។
មាននយោបាយកូនទោលតាំងពីឆ្នាំ១៩៨០ ដើម្បីទប់ស្កាត់កំណើនប្រជាជន ចិនបានចាប់ផ្តើមជំរុញឱ្យពលរដ្ឋបង្កើតកូន និងបានផ្តល់សិទ្ធិឱ្យគូស្វាមីយកកូនបានដល់បីនាក់ តាំងពីឆ្នាំ២០២១មក ជាថ្នូរនឹងជំនួយឧបត្ថម្ភបន្តិចបន្តួច។ ប៉ុន្តែនយោបាយនេះមិនអាចប្តូរផ្លាស់និន្នាការនៃការធ្លាក់ចុះចំនួនពលរដ្ឋបានទេ។ ពលរដ្ឋជំនាន់ក្រោយមិនអាចមានកូនច្រើនឡើយ។ សម្រាប់លោក ហេយ៉ាហ្វូ ចិនត្រូវផ្តល់ជំនួយឱ្យបានច្រើនដល់គ្រួសារ ផ្តល់ដំណោះស្រាយខាងមើលថែកុមារ ឬផ្តល់លទ្ធភាពឱ្យក្មេងឆាប់បានចូលសាលាមតេយ្យ ទើបអាចទប់ស្កាត់វិបត្តិប្រជាសាស្ត្របាន។
វិបត្តិប្រជាសាស្ត្រ បង្កឡើងដោយការធ្លាក់ចុះនៃចំនួនប្រជាពលរដ្ឋនិងពលរដ្ឋចាស់ៗ កំពុងធ្វើឱ្យចិនប្រឈមនឹងបញ្ហាសេដ្ឋកិច្ច ដូចជាខ្វះកម្លាំងពលកម្មសម្រាប់បំប៉នកំណើនសេដ្ឋកិច្ច។ បញ្ហាសង្គម ខ្វះអ្នកមើលថែមនុស្សចាស់ជរា ដែលតាមប្រពៃណីចិន កូនចៅត្រូវមានបន្ទុកមើលថែម្តាយឪពុក តែគំរូគ្រួសារចិនបច្ចុប្បន្នគឺមនុស្សចាស់ពីរនាក់មានកូនតែម្នាក់ ហើយកូនម្នាក់នេះត្រូវមានបន្ទុកមើលមនុស្សចាស់ដល់បួននាក់វិញ។ ដើម្បីសាកល្បងដោះស្រាយបញ្ហានេះ ចិនបានបង្ហាញកាលពីសប្តាហ៍មុន ផែនការជួយមនុស្សចាស់ដ៏ធំមួយ តម្លៃរាប់សិបពាន់លាន ដូចជាបង្កើតមណ្ឌលចាស់ជរា សេវាថែទាំ ឬដឹកជញ្ជូនអាហារ ឱ្យមនុស្សចាស់តាមផ្ទះ។ល។ និង។ល។ ចំណែកគំនិតចង់បើកផ្លូវនាំអន្តោប្រវេសន៍ទំនងមិនអាចទៅរួចទេ ព្រោះចិននឹងត្រូវការដល់ទៅរាប់រយលាន ហើយចិនគ្មានវប្បធម៌គាំទ្រលំហូរអន្តោប្រវេសន៍ទេ សម្រាប់ពេលនេះ។ នេះបើតាមអ្នកជំនាញដដែល៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
