នៅថ្ងៃអង្គារ ​ទី១២ ធ្នូ អង្គការ Unicef បានប្រកាសស្វែងរកថវិកាចំនួនប្រមាណ ៩៣០០លានដុល្លារ សម្រាប់ឆ្នាំ២០២៤ ខាងមុខនេះ ដើម្បីជួយដល់កុមារជាង ៩០លាននាក់ ដែលរងគ្រោះដោយសារជម្លោះប្រដាប់អាវុធ និងគ្រោះមហន្តរាយអាកាសធាតុ។

លោកស្រី Catherine Russell នាយិកាប្រតិបត្តិ នៃអង្គការ Unicef បានបញ្ជាក់ នៅក្នុង​សេចក្តី​ប្រកាសព័ត៌មានថា កុមាររាប់លាននាក់ នៅតែបន្តរងគ្រោះដោយសារវិបត្តិមនុស្សធម៌​ដ៏ធ្ងន់ធ្ងរ។ ពួកគេ​ត្រូវការជំនួយកាន់តែច្រើនឡើង។ ប៉ុន្តែផ្ទុយមកវិញ រាល់​ជំនួយ​មនុស្សធម៌​ទាំងអស់ នៅទូទាំងសកលលោក គឺមិនទាន់គ្រប់គ្រាន់ ដើម្បី​ផ្គត់ផ្គង់​តម្រូវការ​ដ៏​ច្រើន​នេះ​បានឡើយ។ លោកស្រីបានបន្តទៀតថា កុមារទាំងនោះមិនគួរបាត់បង់ជីវិត និងអនាគតរបស់ពួកគេទេ​ ហើយពួកគេគួរតែទទួលបាននូវសេវាមូលដ្ឋានជាចាំបាចរួមមាន សេវាថែទាំសុខភាព ទឹកស្អាត អនាម័យ និងការអប់រំ។

ដើម្បីឆ្លើយតបនឹងទំហំតម្រូវការដ៍សន្ធឹកសន្ធាប់នៃកុមាររងគ្រោះ ដោយសារវិបត្តិមនុស្សធម៌ ខាងលើនេះ អង្គការ Unicef ស្នើសុំទឹកប្រាក់ប្រមាណ ៩៣០០លានដុល្លារ នៅឆ្នាំក្រោយ ដើម្បី​ជួយ​ដល់​កុមារចំនួន ៩៣,៧ លាននាក់ នៅក្នុង១៥៥ប្រទេស។

អង្គការ Unicef ក៏បានកំណត់គោលដៅអាទិភាព និងថវិកាប្រមាណ ១៥០០លានដុល្លារ ជួយដល់ប្រទេសអាហ្វហ្គានីស្ថាន ជនភៀសខ្លួនមកពី​ ស៊ីរី ​ស៊ូដង់ សារធារណរដ្ឋ​ប្រជាធិបតេយ្យ​កុងហ្គោ និងអុយក្រែន។ ជាមួយគ្នានេះ អង្គការ Unicef ក៏គ្រោងចំណាយ​ថវិកា​​​សម្រាប់ចាក់​ថ្នាំ​បង្ការ​ជំងឺកញ្រ្ជឹល ដល់កុមារចំនួន ១៧លាន៣សែន​​នាក់ ​ជួយដល់កុមារដែលខ្វះអាហារូបត្ថម្ភ​ចំ​នួន ៧លាន៦សែននាក់ ជួយដល់កុមារ​ឲ្យបានចូលរៀន ចំនួន ១៩លាន៣សែននាក់ ផ្តល់ទឹកស្អាតដល់កុមារចំនួន ៥២លាន៤សែន​នាក់ ព្រមទាំងជួយផ្តល់សេវាគាំព៌ាសុខភាពផ្លូវចិត្ត ដល់កុមារ និងក្មេងជំទង់ចំនួន ២៦លាន៧សែន​នាក់។

ដោយឡែកនៅថ្ងៃអង្គារ ទី១២ ធ្នូ មូលនិធិអង្គការសហប្រជាជាតិដើម្បីប្រជាជន ហៅកាត់ថា UNFPA ក៏បានប្រកាសស្វែងរកថវិកា​ចំនួន​ប្រមាណ ១២០០លានដុល្លារ ដើម្បីជួយគាំព៌ាដល់សេវាសុខភាពផ្លូវភេទ និងបន្តពួជ របស់ស្រ្តី និងក្មេងស្រីចំនួន ៤៨លាននាក់ នៅក្នុង ៥៨ប្រទេស។ លោកស្រី Natalia Kanem នាយិកាប្រតិបត្តិនៃអង្គការ UNFPA បានលើកឡើងថា «ប្រសិនបើយើង មិនបានគិតគូរជាបន្ទាន់អំពី បញ្ហាសុខភាពផ្លូវភេទ និងការ​បន្តពូជរបស់ស្រ្តីនោះទេ នោះអំពើហឹង្សាផ្លូវភេទ ការ​បង្ខំឲ្យ​កុមាររៀបការទាំងវ័យក្មេង មរណភាពនៅពេលពរពោះ និងពេល​សម្រាលកូននឹងកើតមានកាន់តែច្រើន»។

បញ្ហាខាងលើនេះ  ត្រូវបានអង្គការ UNFPA ដាក់ចុះជា​គោលដៅអាទិភាព ដើម្បីជួយដល់ប្រទេសមួយចំនួនមានដូចជា អាហ្វហ្គានីស្ថាន ស៊ូដង់ យេម៉ែន ស៊ីរី អ៊ុយក្រែន សូម៉ាលី និងអេត្យូពី៕

ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh