កម្ពុជា-វៀតណាម ចុះ MOU ៣ចំណុចទាក់ទងនឹងបច្ចេកវិទ្យា ការទូត និងពាណិជ្ជកម្ម
13-ធ្នូ-2023
កម្ពុជា និងវៀតណាម បានចុះហត្ថលេខាលើ កិច្ចសហប្រតិបត្តិការរវាងគ្នាចំនួន៣ចំណុច ក្រោមវត្តមានរបស់លោកនាយករដ្ឋមន្ត្រី ហ៊ុន ម៉ាណែត និងលោក ផាម មិញជិញ (Pham Minh Chinh) នាយករដ្ឋមន្ត្រីវៀតណាម។ ការចុះកិច្ចព្រមព្រៀងរវាងប្រទេសទាំងពីរទាក់ទងទៅនឹងកិច្ចសហប្រតិបត្តិការលើវិស័យវិទ្យាសាស្ត្រ វិទ្យាស្ថានការទូត និងកិច្ចការពាណិជ្ជកម្ម បានធ្វើឡើងអំឡុងពេលដែលលោក ហ៊ុន ម៉ាណែត បំពេញទស្សនកិច្ចផ្លូវការរយៈពេលពីរថ្ងៃ គឺចាប់ពីថ្ងៃទី១១ ដល់ថ្ងៃទី១២ ខែធ្នូនៅប្រទេសវៀតណាម។
បន្ទាប់ពីជំនួបទ្វេភាគី នាយករដ្ឋមន្ត្រីនៃប្រទេសទាំងពីរគឺ លោក ហ៊ុន ម៉ាណែត និងលោក ផាម មិញជិញ(Pham Minh Chinh) បានធ្វើជាអធិបតីនៃពិធីចុះហត្ថលេខាលើឯកសារចំនួន៣ គឺទី១ អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការលើវិស័យវិទ្យាសាស្រ្ត បច្ចេកវិទ្យា និងនវានុវត្តន៍រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា និងក្រសួងវិទ្យាសាស្រ្ត និងបច្ចេកវិទ្យាវៀតណាម។
ទី២ គឺអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការរវាងវិទ្យាស្ថានជាតិការទូត និងទំនាក់ទំនងអន្តរជាតិ និងបណ្ឌិតសភាការទូតវៀតណាម និងទី៣ គឺអនុស្សរណៈនៃការយោគយល់គ្នារវាងសភា ពាណិជ្ជកម្មកម្ពុជា និងសភាពាណិជ្ជកម្មវៀតណាម។ នេះបើតាមការបង្ហោះលើហ្វេសប៊ុកលោកនាយករដ្ឋមន្ត្រី ហ៊ុន ម៉ាណែត។
ក្រៅពីនេះ កាសែតវៀតណាមផ្លឺស(Vietnam +) ជាភាសាបរទេស បានចុះផ្សាយពីទំហំពាណិជ្ជកម្មកម្ពុជា-វៀតណាម ដែលបានឈានដល់ ១១ពាន់លានដុល្លារ នៅឆ្នាំ២០២២ កើនប្រមាណ១១% ធៀបនឹងឆ្នាំកន្លងទៅ។ ដោយឡែក ចាប់ពីខែមករា ដល់ខែតុលា ឆ្នាំ២០២៣នេះ ទំហំពាណិជ្ជកម្មកម្ពុជា-វៀតណាម មានប្រមាណជាង៧ពាន់លានដុល្លារ គឺធ្លាក់ចុះ ២២% ធៀបនឹងរយៈពេលដូចគ្នាក្នុងឆ្នាំ២០២២។
បច្ចុប្បន្នវៀតណាមជាដៃគូពាណិជ្ជកម្មធំបំផុតរបស់កម្ពុជាក្នុងតំបន់អាស៊ាន និងជាដៃគូពាណិជ្ជកម្មធំទីបី បន្ទាប់ពីប្រទេសចិន និងសហរដ្ឋអាមេរិក។ មកទល់ពេលនេះ វៀតណាមបានបណ្តាក់ទុនប្រមាណ ២,៩៤ពាន់លានដុល្លារ តាមរយៈគម្រោងវិនិយោគចំនួន ២០៥ នៅកម្ពុជា ដែលជាប់លេខ៥ នៃការវិនិយោគពីបរទេសរបស់កម្ពុជា។
ដោយឡែក លើវិស័យទេសចរណ៍វិញ ភ្ញៀវទេសចរវៀតណាមចូលមកកម្ពុជាមានការកើនឡើងដល់ទៅ ៨៨ម៉ឺននាក់ ហើយទេសចរពីកម្ពុជាទៅវៀតណាមកើនឡើងជាង ៣០០ ០០០នាក់ ចាប់ពីខែមករា ដល់ខែតុលា។ នេះបើតាមកាសែតវៀតណាម។
ក្រៅពីនេះប្រមុខរដ្ឋាភិបាលកម្ពុជាបានជួបពិភាក្សាជាមួយអគ្គលេខាធិការបក្សកុម្មុនីស្តវៀតណាម លោក ង្វៀន ហ៊្វូចុង ប្រធានរដ្ឋវៀតណាម លោក វ៉ វ៉ាន់ធឿង ប្រធានរដ្ឋសភាវៀតណាម ជួបប្រធានសមាគមមិត្តភាពកម្ពុជា-វៀតណាម និងមានកម្មវិធីថ្លែងសុន្ទរកថានៅសកលវិទ្យាល័យពាណិជ្ជកម្មហាណូយផងដែរ៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
