ប្រធានាធិបតី​បារាំង​លោក​ អេម៉ានុយអែល ម៉ាក្រុង​(​Emmanuel MACRON)​ បានអះអាង​ថា ​នឹង​បន្ត​ជួយដល់​កម្ពុជា​ក្នុងការ​បណ្តុះបណ្តាល​ធនធាន​មនុស្ស ​ជួយ​វិស័យ​វប្បធម៌ ​និង​គាំទ្រដល់​កម្ពុជា​ក្នុងការ​ធ្វើជា​ម្ចាស់ផ្ទះ​នៃ​កិច្ចប្រជុំ​កំពូល​ហ្វ្រង់កូហ្វូនី​លើក​ទី​២០ ​នៅ​ឆ្នាំ​២០២៦​។ ការ​បញ្ជាក់​របស់​លោក​ប្រធានាធិបតី​បារាំង​ដូច្នេះ ​ធ្វើឡើង​នៅក្នុង​ជំនួប​សវនាការ​មួយ​ជាមួយ​ព្រះមហាក្សត្រ​ខ្មែរ ​ព្រះបាទ ​នរោត្តម សីហមុនី ​អំឡុងពេល​ព្រះអង្គ​បំពេញ​ព្រះរាជ​ទស្សនកិច្ច​នៅ​ប្រទេស​បារាំង​ពីថ្ងៃ​ទី​១២ ​ដល់ថ្ងៃ​ទី​១៨ ​ខែ​វិច្ឆិកា ​ឆ្នាំ​២០២៣​នេះ​។

នៅក្នុងជំនួប​សវនាការ​នាវិមាន ​អេលីហ្សេ​(Elysée) លោក​ប្រធានាធិបតី​បារាំង ​Emmanuel MACRON ​បានថ្លែង​ថ្វាយ​ព្រះមហាក្សត្រ​កម្ពុជា ​ព្រះបាទ​សម្តេច ព្រះនរោត្តម ​សីហមុនី ​ថា​បារាំងនឹង​បន្តជួយ​ដល់វិស័យ​នានា​របស់កម្ពុជា ពិសេស​វិស័យសុខាបាល ​តាមរយៈការជួយបណ្តុះបណ្តាល​ធនធាន​មនុស្ស ការ​គាំទ្រដល់កម្មវិធី​បង្កាជំងឺ​ឆ្លងពីសត្វ​ទៅមនុស្ស​ ការវះកាត់​ពីចំងាយ​(Tele-Chirugie) និងការ​ប្រើបញ្ញាសិប្បនិមិត្ត​នៅក្នុង​វិស័យនេះ​។ នេះបើតាម​សេចក្តីប្រកាសព័ត៌មាន​របស់​នាយកដ្ឋានអឺរ៉ុប​នៃ​ក្រសួង​ការបរទេសកម្ពុជា​នៅថ្ងៃទី​១៣ ខែ​វិច្ឆិកា ​ម្សិលមិញ​។

ចំពោះវិស័យ​វប្បធម៌​លោក ម៉ាក្រុង ​ក៏បានប្តេជ្ញាចិត្តដែរ​ក្នុងការជួយដល់​គម្រោងជួសជុល ​និង​ពង្រីកសារមន្ទីរ​ជាតិ និង​គម្រោងជួសជុល​ព្រះវិស្ណុ​ធ្វើពី​សំរឹទ្ធ ដើម្បីយកទៅ​តាំងនៅប្រទេសបារាំង ​ជាមួយនឹង​វត្ថុបុរាណ​មួយចំនួនទៀត។​ លោកក៏បានចាត់ទុកដែរថា​ ជោគជ័យនៃ​យន្តការអន្តររដ្ឋាភិបាល​ស្តីពី​ ការអភិរក្សរមណីយដ្ឋាន​ប្រវត្តិសាស្ត្រ​តំបន់អង្គរ ​គឺជា​គំរូពហុនិយមមួយ​។

លើសពីនេះ ​លោក​ប្រធានាធិបតីក៏បាន​សន្យាថា​នឹងបញ្ជូនអ្នក​បច្ចេកទេសបារាំង​មកសិក្សា និង​ជួសជុលព្រះរាជ​ដំណាក់ណាប៉ឡេអុង​ III (Pavillon Napoleon III) ​នៅក្នុង​បរិវេណ​ព្រះបរមរាជវាំង​។ អ្វីដែលបង្ហាញពី​ទំនាក់ទំនង​កម្ពុជា-បារាំង ​នៅក្នុងឱកាស​ខួប៧០​ឆ្នាំ នៃការ​ទទួលបាន​ឯករាជ្យរបស់​កម្ពុជា លោក​ប្រធានាធិបតី​ Emmanuel MACRON ​បានលើកទឹកចិត្ត​ឲ្យកម្ពុជា​ធ្វើជាម្ចាស់ផ្ទះ​នៃកិច្ចប្រជុំ​កំពូលហ្វ្រង់កូហ្វូនី​នៅឆ្នាំ​២០២៦ ​ហើយបារាំងនឹង​គាំទ្រ​បេក្ខភាពកម្ពុជា​។

ចំណុចនេះ ​ត្រូវព្រះមហាក្សត្រ​កម្ពុជាព្រះបាទ​ នរោត្តម សីហមុនី ​សម្តែងនូវ​មោទនភាព​ ដោយព្រះអង្គចាត់ទុក​ថា ការគាំទ្រ​របស់បារាំង​ពិតជាមាន​តម្លៃយ៉ាងខ្លាំង ​ព្រោះថា​កិច្ចគាំទ្រនេះ ​នឹងឆ្លុះបញ្ចាំង​ពីឆន្ទៈក្នុងការ​ពង្រឹងវត្តមាន​ដ៏មានសារៈសំខាន់​របស់បារាំង​នៅអាស៊ី។​ នេះបើតាម​សេចក្តីប្រកាស​ព័ត៌មាន​៕

ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh