វិស័យឯកជនស្នើឲ្យរដ្ឋាភិបាលកែសម្រួលបរិយាកាសវិនិយោគបន្ថែមទៀត
14-វិច្ឆិកា-2023
វិស័យឯកកជនក្រុម«ជ»ផ្នែកទំនាក់ទំនងវិជ្ជាជីវៈ បានស្នើឲ្យរដ្ឋាភិបាលកម្ពុជាជួយកែសម្រួលបរិយាកាសវិនិយោគ និងបន្តកាត់បន្ថយថ្លៃដើមនៃការអភិវឌ្ឍន៍ធនធានមនុស្ស។ ការស្នើឡើងរបស់វិស័យឯកជនដូច្នេះគឺធ្វើឡើងខណៈដែលមានការរៀបចំវេទិការាជរដ្ឋាភិបាល និងផ្នែកឯកជនលើកទី១៩ នាព្រឹកថ្ងៃចន្ទ ទី១៣ ខែវិច្ឆិកានេះ នៅវិមានសន្តិភាព។
លោកឧកញ៉ា ណាង សុធី សហប្រធានផ្នែកឯកជន និងក្រុមការងារផ្នែកទំនាក់ទំនងវិជ្ជាជីវៈ ក្រុម«ជ» បានស្នើដល់ប្រមុខរដ្ឋាភិបាលកម្ពុជា លោក ហ៊ុន ម៉ាណែត ឲ្យជួយកែសម្រួលដល់បរិយាកាសវិនិយោគ និងបន្តកាត់បន្ថយថ្លៃដើមនៃការអភិវឌ្ឍន៍ធនធានមនុស្ស។ នៅក្នុងបទអន្តរាគមន៍រយៈពេល១៥នាទី ក្នុងវេទិការាជរដ្ឋាភិបាល និងផ្នែកឯកជនលើកទី១៩នេះ លោក ណាង សុធី បានលើកឡើងពីភាពប្រសើរឡើងជាច្រើនចំណុច ដែលខាងវិស័យឯកជនក្រុម «ជ» សម្រេចបានជាមួយក្រសួងការងារ និងបណ្តុះបណ្តាលវិជ្ជាជីវៈ។
លោកថា សំណូមពរចំនួន១៤ចំណុច របស់វិស័យឯកជន ត្រូវបានក្រសួងការងារដោះស្រាយហើយ ដែលក្នុងនោះមានការធ្វើវិសោធនកម្មច្បាប់ការងារ របបសន្តិសុខសង្គម ការបណ្តុះបណ្តាលវិជ្ជាជីវៈ ការពង្រឹងប្រព័ន្ធអធិការកិច្ចការងារ ដែលនឹងត្រូវធ្វើតែ១លើកក្នុងមួយឆ្នាំ ដើម្បីឆ្លើយតបទៅនឹងការវិវត្តន៍ផ្នែកសង្គម សេដ្ឋកិច្ចជាដើម សំដៅបង្កើតបរិយាកាសល្អ នៅក្នុងវិស័យវិនិយោគរបស់ប្រទេសកម្ពុជា។
នៅក្នុងការថ្លែងរបស់លោក អូន ព័ន្ធមុនីរ័ត្ន រដ្ឋមន្ត្រីក្រសួងហិរញ្ញវត្ថុ លោកបានយោងតាម Business Ready របស់ធនាគារពិភពលោកដែលបានបញ្ជាក់ថា កម្ពុជាបានកាត់បន្ថយចំណាយចាប់ផ្តើមធុរកិច្ចពី៥៣% នៃចំណូលសម្រាប់មនុស្សម្នាក់នៅឆ្នាំ២០១៩ មកត្រឹម ២២% នៅឆ្នាំ២០២២។ ចំណាយឡូជីស្ទិកត្រូវបានកាត់បន្ថយពី៣៣% នៃ ផ.ស.ស នៅឆ្នាំ២០១៥ មកត្រឹម ២៦% នៃ ផ.ស.ស នៅឆ្នាំ២០២២ និងថ្លៃអគ្គិសនីសម្រាប់ឧស្សាហកម្មត្រូវបានកាត់បន្ថយពី ១៦,៧សេន/គីឡូវ៉ាត់ម៉ោងនៅត្រឹមឆ្នាំ២០១៧ មកត្រឹម១៣,៧សេន/គីឡូវ៉ាត់ម៉ោងនៅឆ្នាំ២០២២។
ការកាត់បន្ថយទាំងអស់នេះ ត្រូវអ្នកវិនិយោគមើលឃើញថានៅតិចតួចនៅឡើយ។ ក៏ប៉ុន្តែរដ្ឋាភិបាលយល់ថា ជាការប្រឹងប្រែងប្រកបដោយឆន្ទៈក្រោមពាក្យស្លោកថា«កែទម្រង់ រស់ មិនកែទម្រង់ ស្លាប់»។
ជាមួយគ្នានេះ វិស័យឯកជនក៏បានលើកឡើងដែរថា ដើម្បីឲ្យមានប្រសិទ្ធភាពពួកគេបានស្នើសុំឲ្យមានយន្តការទទួលពាក្យបណ្តឹងពីរោងចក្រ សហគ្រាស គ្រឹះស្ថាន ក្នុងករណីចុះអធិការកិច្ចក្រៅក្របខណ្ឌក្រុមអធិការកិច្ចផ្លូវការ។
នៅក្នុងឱកាសនេះ លោកនាយករដ្ឋមន្ត្រី ហ៊ុន ម៉ាណែត ក៏បានឆ្លើយតបជាវិជ្ជមាន ដោយបញ្ជាក់ឲ្យមន្ត្រីរបស់លោក រួមគ្នាធ្វើអធិការកិច្ចក្នុងមួយឆ្នាំតែមួយដងគត់ ទៅលើក្រុមហ៊ុន សហគ្រាស គ្រឹះស្ថាន ដែលចំណុចនេះ វិស័យឯកជនបានសាទរយ៉ាងខ្លាំង៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
