បើតាមរបាយការណ៍ចេញផ្សាយនៅសប្តាហ៍នេះ គម្រោងផ្លូវមួយខ្សែក្រវ៉ាត់មួយរបស់ចិន បានរុញច្រានប៉េកាំងឱ្យក្លាយជាម្ចាស់បំណុលដ៏ធំ ទំហំប្រមាណជាង ១១០០ពាន់លានដុល្លារ។ កូនបំណុល ៨០% ជាប្រទេសក្រីក្រ មានវិបត្តិហិរញ្ញវត្ថុ។
ផ្តួចផ្តើមដោយលោកប្រធានាធិបតីចិន ស៊ី ជីនពីង កាលពី១០ឆ្នាំមុន ដើម្បីបង្ហាញឥទ្ធិពលពាណិជ្ជកម្មដ៏ចែងចាំងរបស់ចិន គម្រោងផ្លូវសូត្រថ្មី ឬគម្រោងផ្លូវមួយខ្សែក្រវ៉ាត់មួយ ប្រមូលផ្តុំជាង ១៥០ប្រទេស រាប់តាំងពីអ៊ុយរ៉ាហ្កាយ ដល់ស្រីលង្កា ភូមា ម៉ាឡេស៊ី ដោយមិនភ្លេចទេបណ្តាប្រទេសនៅទ្វីបអាហ្វ្រិក។
ដើម្បីសម្រេចគម្រោងនេះ ចិនបានផ្តល់ប្រាក់កម្ចីដ៏មហិមាដល់បណ្តាប្រទេសមានចំណូលទាប និងមធ្យម សម្រាប់សាងសង់ហេដ្ឋារចនាសម្ព័ន្ធដូចជាកំពង់ផែ ស្ពាន ផ្លូវដែក ឬផ្លូវថ្នល់ល្បឿនលឿន។ ឥលូវដល់វេលាដែលបណ្តាប្រទេសក្រីក្រ និងមធ្យមទាំងនេះ ត្រូវសងប្រាក់ដើមហើយ។ នេះបើតាមរបាយការណ៍ AidData របស់វិទ្យាស្ថានស្រាវជ្រាវ College of William and Mary ចេញផ្សាយកាលពីថ្ងៃចន្ទ ទី៦ វិច្ឆិកា ២០២៣ ដោយព្យាករថា កូនបំណុលត្រូវសងប្រាក់ ដើមឱ្យបាន ៧៥% នៅដំណាច់ទសវត្សរ៍។
បើតាមការវិភាគទិន្នន័យស្តីពី កម្ចីហិរញ្ញវត្ថុចិនក្នុង១៦៥ប្រទេស ដែលមានគម្រោងសរុបជិត ២១០០០គម្រោង AidData យល់ថា ក្នុងមួយឆ្នាំៗប៉េកាំងព្រមផ្តល់ជំនួយ និងកម្ចីហិរញ្ញវត្ថុប្រមាណជិត ៨០ពាន់លានដុល្លារ ដល់បណ្តាលប្រទេសក្រីក្រ និងមានចំណូលមធ្យមទល់នឹងអាមេរិក ដែលព្រមត្រឹម ៦០ពាន់លានដុល្លារ ប៉ុណ្ណោះក្នុងមួយឆ្នាំ ចំពោះក្រុមប្រទេសដូចគ្នា។ ដូច្នេះមានន័យថា ចិនជាម្ចាស់បំណុលដ៏ធំជាងគេនៅលើពិភពលោក ជាផ្លូវការ។ ជាសរុប ដោយមិនរាប់ការប្រាក់បញ្ចូលចិនកំពុងក្តាប់បំណុលដើម ចំនួនយ៉ាងហោច ១១០០ពាន់លានដុល្លារ។ នេះបើតាមការបញ្ជាក់របស់ AidData ដែលប៉ាន់ស្មានទៀតថា ៨០% នៃប្រាក់បំណុលបរទេសដែលជំពាក់ចិន នៅលើពិភពលោកជាបំណុលអភិវឌ្ឍជួយទ្រទ្រង់ប្រទេសកំពុងមានបញ្ហាហិរញ្ញវត្ថុនាពេលបច្ចុប្បន្ននេះ។
ថ្វីបើជាផ្លូវការ សកម្មជននៃគម្រោងផ្លូវសូត្រថ្មីចិន អួតអាងថាគម្រោងបានពាំនាំធនធាន និងកំណើនអភិវឌ្ឍន៍ដល់បណ្តាប្រទេសក្រីក្រដ៏ច្រើនមែន ប៉ុន្តែសម្រាប់អ្នកប្រឆាំង ក្រុមហ៊ុនចិនទទួលបន្ទុកសាងសង់ហេដ្ឋារចនាសម្ព័ន្ធនានាគ្មានតម្លាភាពផ្នែកតម្លៃទេ។ ប្រទេសខ្លះ មានអាទិ៍ម៉ាឡេស៊ី ឬភូមា កំពុងសាកល្បងចរចាជាមួយចិនឡើងវិញ ដើម្បីសម្រាលបន្ទុកហិរញ្ញវត្ថុរបស់ខ្លួន៕
ប្រភពព័ត៌មាន ៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
