របពេលដែលប្រទេសមួយចំនួនក្នុងពិភពលោក បាននិងកំពុងប្រឈមវិបត្តិសន្តិសុខស្បៀង និងការប្រែប្រួលអាកាសធាតុ កម្ពុជាមិនត្រឹមតែបញ្ចៀសបាននូវវិបត្តិស្បៀងប៉ុណ្ណោះទេ ប៉ុន្តែថែមទាំងបានចាប់យកឱកាសនេះ ដើម្បីពង្រឹងប្រព័ន្ធស្បៀង តាមរយៈការដាក់ចេញវិធានការ ដើម្បីផលិត និងផ្គត់ផ្គង់ផលិផលកសិកម្ម ប្រកបដោយគុណភាព ទៅកាន់ទីផ្សារអន្តរជាតិ ពិសេសស្រូវអង្ករ។ នេះបើតាមការគូសបញ្ជាក់នៅក្នុងសារលិខិតរបស់ប្រមុខរដ្ឋាភិបាលកម្ពុជា សម្រាប់ទិវាអាហាររូបត្ថម្ភលើកទី១០ នៅថ្ងៃទី៦ វិច្ឆិកា ក្រោមប្រធានបទ «ការពង្រឹងសន្តិសុខស្បៀងក្នុងបរិបទនៃការប្រែប្រួលអាកាសធាតុ»។
ដោយជឿថា កម្ពុជានឹងសម្រេចបានចក្ខុវិស័យស្តីពីប្រព័ន្ធស្បៀងឆ្នាំ២០៣០ លោក ហ៊ុន ម៉ាណែត បានអះអាងថា កម្ពុជានឹងបន្តសហការជាមួយប្រទេសនានា អង្គការសហប្រជាជាតិ ដៃគូអភិវឌ្ឍន៍ សង្គមស៊ីវិល និងវិស័យឯកជន ដើម្បីលើកកម្ពស់សន្តិសុខស្បៀងឲ្យកាន់តែរឹង និងកាត់បន្ថយផលប៉ះពាល់បរិស្ថាន។
ប្រមុខរដ្ឋាភិបាល បានជំរុញឲ្យក្រសួងកសិកម្មបន្តស្រាវជ្រាវ និងផ្សព្វផ្សាយបច្ចេកទេសថ្មីៗ គ្រាប់ពូជដំណាំ និងពូជសត្វដែលមានភាពធន់នឹងការប្រែប្រួលអាកាសធាតុ ដើម្បីផលិតស្បៀងដែលកើតចេញពីធម្មជាតិ ដើម្បីលើកកម្ពស់សន្តិសុខស្បៀង និងអាហាររូបត្ថម្ភរបស់ប្រជាជន។
ក្របខ័ណ្ឌកម្មវិធីប្រចាំប្រទេស ( CPF) នៃអង្គការសហប្រជាជាតិ បានកំណត់នូវអាទិភាពចំនួន ៣ ដើម្បីជាការតម្រង់ទិសដល់រដ្ឋាភិបាលកម្ពុជា សំដៅលើកកម្ពស់ បទដ្ឋានសកលដែលមានលក្ខណៈច្នៃប្រឌិតថ្មី តាមរយៈការផ្ដល់ការគាំទ្រជាជំនាញឯកទេសនៅថ្នាក់ជាតិ ថ្នាក់តំបន់ និងថ្នាក់អន្តរជាតិ ក្នុងរយៈពេល៥ឆ្នាំ ពីឆ្នាំ ២០១៩ ដល់ឆ្នាំ ២០២៣ ដោយទី១ បង្កើនផលិតភាព ការធ្វើពិពិធកម្ម និងពាណិជ្ជភាវូបនីយកម្មកសិកម្ម និងប្រព័ន្ធស្បៀងដែលយកចិត្តទុកដាក់ចំពោះសុវត្ថិភាពស្បៀង និងអាហារូបត្ថម្ភ ដើម្បីកាត់បន្ថយភាពក្រីក្រ និងលើកកម្ពស់ សន្តិសុខស្បៀង និងអាហារូបត្ថម្ភ។ ២ ការគ្រប់គ្រងធនធានធម្មជាតិប្រកបដោយសមធម៌ និងចីរភាព និងការបង្កើនសមត្ថភាពពិនិត្យតាមដាន និងរាយការណ៍ពីសកម្មភាពអាកាសធាតុ។ និងទី៣ កាត់បន្ថយភាពងាយរងគ្រោះ និងបង្កើនភាពធន់ទៅនឹងការប្រែប្រួលអាកាសធាតុ និងវិបត្តិដែលកើតមាននៅថ្នាក់ជាតិ កម្រិតសហគមន៍ និងកម្រិតគ្រួសារ៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
