បរិមាណល្អងធូលីក្នុងបរិយាកាសបន្តកើនឡើងនៅឆ្នាំ ២០២២។ នេះបើតាមរបាយការណ៍ប្រចាំឆ្នាំ ដែលអង្គការឧតុនិយមពិភពលោក ចេញផ្សាយ នៅថ្ងៃព្រហស្បតិ៍។ តាមស្ថាប័នរបស់អង្គការសហប្រជាជាតិ គេត្រូវយកចិត្តទុកដាក់ សិក្សាស៊ីជម្រៅពីការប្រែប្រួលអាកាសធាតុដែលអាចជាកត្តាជំរុញឲ្យបាតុភូតធម្មជាតិនេះចេះតែកើនឡើងនៅក្នុងពិភពលោក។
ពីមួយឆ្នាំទៅមួយឆ្នាំ បរិមាណល្អងធូលី នៅក្នុងខ្យល់បរិយាកាសចេះតែកើនឡើងចំនួន ជាលំដាប់។ បន្ទាប់ពីកើនឡើងនៅឆ្នាំ ២០២១ បរិមាណធូលីនៅក្នុងបរិយាកាសបន្តកើនឡើងនៅឆ្នាំ ២០២២។ ជាក់ស្តែង បើតាមរបាយការណ៍របស់អង្គការឧតុនិយមពិភពលោក នៅក្នុងខ្យល់១ម៉ែត្រគូប គេរកឃើញមានកំហាប់ធូលីជាមធ្យម ១៣,៨មីក្រូក្រាម ច្រើនជាងឆ្នាំ ២០២១ ដែលមានតែ ១៣,៥មីក្រូក្រាម។
តាមអង្គការឧតុនិយមពិភពលោក ព្យុះខ្សាច់ ឬព្យុះធូលីជាបាតុភូតធម្មជាតិ ប៉ុន្តែយ៉ាងណាក៏ដោយ សកម្មភាពរបស់មនុស្សដែលទទួលខុសត្រូវក្នុងការបញ្ចេញឧស្ម័នកាបូនិក ជាដើមហេតុចំបងធ្វើឲ្យព្យុះខ្សាច់ ព្យុះធូលីកាន់តែកើនឡើងនៅក្នុងពិភពលោក។ លោកPetteri Taalas ប្រធានអង្គការឧតុនិយមពិភពលោក បានពន្យល់យ៉ាងដូច្នេះថា គ្រោះរាំងស្ងួត អាកាសធាតុក្តៅខ្លាំង ដីស្ងួតហួតហែង បូកផ្សំនឹងការគ្រប់គ្រងគុណភាពដីមិនបានល្អ គឺជាកត្តាជំរុញឲ្យកើតមានកាន់តែច្រើន ព្យុះខ្សាច់ និងព្យុះធូលី។
តាមរបាយការណ៍របស់អង្គការឧតុនិយមនៅក្នុងពិភពលោក ជារៀងរាល់ឆ្នាំ មានធូលី ប្រមាណ ២ពាន់លានតោនហោះចូលក្នុងខ្យល់បរិយាកាស ធ្វើឲ្យងងឹតមេឃ បំផ្លាញគុណភាពខ្យល់ នៅក្នុងតំបន់ដែលអាចលាតសន្ធឹងជាច្រើនពាន់គីឡូម៉ែត្រ។ របាយការណ៍របស់ស្ថាប័នអង្គការសហប្រជាជាតិបានលើកយកករណី ព្យុះខ្សាច់នៅឆ្នាំ២០២២ ដែលបក់ចេញពីតំបន់អាហ្វ្រិកខាងជើង ឆ្លងសមុទ្រមេឌីទែរ៉ាណេចូលទៅដល់តំបន់អឺរ៉ុបខាងត្បូង ដូចជាប្រទេសអេស្ប៉ាញ និងព័រទុយហ្កាល់។ ទីភ្នាក់ងារត្រួតពិនិត្យគុណភាពខ្យល់របស់អឺរ៉ុបកំណត់កំហាប់ធូលីក្នុងខ្យល់ពុលបរិយាកាសប្រមាណ ៥០មីក្រូក្រាមក្នុងមួយម៉ែត្រគូប ប៉ុន្តែនៅក្នុងគ្រោះខ្យល់ព្យុះខ្សាច់ ដែលធ្វើប្រទេសអឺរ៉ុបនៅខាងត្បូង អួរអ័ព្ទដោយខ្យល់ពុលបរិយាកាស គេរកឃើញមានកំហាប់ធូលីដល់ទៅ ៣៥០០មីក្រូក្រាម។ នៅតំបន់ដើមបូព៌ា ព្យុះល្អងធូលី កាលពីខែឧសភាកន្លងទៅបានធ្វើឲ្យតំបន់ទាំងមូលចុះស្រអាប់ ចាក់ភ្នែកមិនយល់។ តាមរបាយការណ៍ របស់អង្គការឧតុនិយមពិភពលោក ព្យុះខ្សាច់ និងព្យុះល្អងធូលីជះផលអាក្រក់សម្រាប់សុខភាពមនុស្សសត្វ ផ្លូវដឹកជញ្ជូន ទាំងផ្លូវអាកាសនិងផ្លូវគោក និងបំផ្លាញធ្ងន់ធ្ងរ ដំណាំកសិកម្ម។
ជាចុងក្រោយ អង្គការឧតុនិយមពិភពលោកទាមទារឲ្យគេសិក្សាស្រាវជ្រាវបន្ថែមទៀត ពីការជាប់ទាក់ទងគ្នារវាងខ្យល់ព្យុះខ្សាច់ និងការប្រែប្រួលអាកាសធាតុ។ នៅត្រង់ចំណុចនេះ ប្រធានអង្គការឧតុនិយមពិភពលោក ចង់ឲ្យមានក្រុមអ្នកជំនាញខាងព្យាករព្យុះខ្សាច់ ព្យុះធូលី ដើម្បីទាញសញ្ញាអាសន្នឲ្យគេដឹង និងប្រុងប្រៀបការពារខ្លួនពីគ្រោះថ្នាក់បង្កឡើងដោយបាតុភូតធម្មជាតិមួយនេះ៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
