ពាណិជ្ជកម្ម សន្តិសុខ ទេសចរណ៍ ពលករ ជារបៀបវារៈសំខាន់នៃជំនួបមេដឹកនាំកម្ពុជា-ថៃ
2-តុសា-2023
នាយករដ្ឋមន្ត្រីកម្ពុជា លោក ហ៊ុន ម៉ាណែត និងនាយករដ្ឋមន្ត្រីថៃ លោក សេដ្ឋា ថាវីស៊ីន កាលពីថ្ងៃទី២៨ ខែកញ្ញា ម្សិលមិញ បានលើកយករបៀបវារៈសំខាន់ៗមួយចំនួនមកពិភាក្សាគ្នាដូចជា ទំនាក់ទំនងពាណិជ្ជកម្មទេសចរណ៍រវាងប្រទេសទាំងពីរ បញ្ហាសន្តិសុខតាមព្រំដែន និងបញ្ហាពលករអន្តោប្រវេសន៍កម្ពុជាធ្វើការក្នុងប្រទេសថៃជាដើម។ ការជជែកពិភាក្សាគ្នាលើប្រធានបទសំខាន់ៗទាំងនេះ បានធ្វើឡើងបន្ទាប់ពីដំណើរទស្សនកិច្ចរយៈពេលខ្លីរបស់ លោក សេដ្ឋា ថាវីស៊ីន នៅប្រទេសកម្ពុជាជាលើកដំបូង។ 
ក្រៅពីការប្តេជ្ញាចិត្តជាថ្មីលើកកម្ពស់កិច្ចសហប្រតិបត្តិការឲ្យឈានដល់កម្រិតថ្មី និងការប្រាស្រ័យទាក់ទងគ្នាកម្រិតខ្ពស់ នាយករដ្ឋមន្ត្រីកម្ពុជា លោក ហ៊ុន ម៉ាណែត និងនាយករដ្ឋមន្ត្រីថៃ លោក សេដ្ឋា ថាវីស៊ីន បានលើកយកបញ្ហាពាណិជ្ជកម្មរវាងប្រទេសទាំងពីរមកជជែក។
នាយករដ្ឋមន្ត្រីនៃប្រទេសទាំងពីរ បានឯកភាពប្រគល់ភារកិច្ចឲ្យអាជ្ញាធរពាក់ព័ន្ធប្រើប្រាស់យន្តការដែលមានស្រាប់ប្រកបដោយប្រសិទ្ធភាព និងរិះរកកាលានុវត្តភាពប្រកបដោយសក្តានុពលបន្ថែម ដើម្បីបង្កើនទំហំពាណិជ្ជកម្មឆ្លងកាត់ព្រំដែនសំដៅសម្រេចបាននូវគោកដៅពាណិជ្ជកម្មទំហំ ១៥ពាន់លានដុល្លារ នៅឆ្នាំ២០២៥។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា។
តាមសេចក្តីប្រកាសដដែល បញ្ហាទេសចរណ៍ក៏ជារបៀបវារៈសំខាន់ដែរ ដោយប្រទេសទាំងពីរជំរុញឲ្យមានផែនការសកម្មភាពរួមស្តីពីកិច្ចសហប្រតិបត្តិការទេសចរណ៍ ឆ្នាំ២០២៣-២០២៥ និងជំរុញបន្ថែមនូវលំហូរភ្ញៀវទេសចររវាងប្រទេសទាំងពីរ និងមកពីប្រទេសទីបីស្របតាមពាក្យស្លោក «ព្រះរាជាណា ចក្រពីរ គោលដៅតែមួយ»។
ចំពោះពលករកម្ពុជាជាង១លាននាក់ ធ្វើការនៅប្រទេសថៃវិញ នាយករដ្ឋមន្ត្រីថៃចាត់ទុកពលករកម្ពុជាថា បានដើរតួនាទីយ៉ាងសំខាន់ក្នុងការជួយជំរុញសេដ្ឋកិច្ចថៃ ដែលបញ្ហានេះ ថៃនឹងយកចិត្តទុកដាក់ដល់សុខមាលភាពរបស់ពួកគេ។
ពាក់ព័ន្ធនឹងវិស័យការពារជាតិ និងសន្តិសុខ ភាគីទាំងពីរ ក៏បានប្តេជ្ញាចិត្តសហការគ្នាយ៉ាងជិតស្និទ្ធក្នុងការទប់ស្កាត់ និងបង្ក្រាបសកម្មភាពខុសច្បាប់ ផ្លាស់ប្តូរ និងចែករំលែកព័ត៌មាន ប្រឆំាំងឧក្រិដ្ឋកម្មឆ្លងដែន ជំងឺឆ្លង និងព័ត៌មានក្លែងក្លាយជាដើម។ ក្រៅពីនេះបញ្ហាសម្រួលនីតិវិធីអន្តោប្រវេសន៍ ការបង្កើតអគ្គកុងស៊ុលកម្ពុជានៅក្នុងខេត្តរបស់ថៃ ក៏ត្រូវបានលើកមកជជែកផងដែរ។
ក៏ប៉ុន្តែបញ្ហាសំខាន់ដែលមិនមាននៅក្នុងរបៀបវារៈផ្លូវការ ហើយដែលអ្នកតាមដានសង្គម និងនយោបាយខ្មែ-ថៃ មានការចាប់អារម្មណ៍ខ្លាំងគឺបញ្ហាឆបោកតាមអនឡាញ និងការបាត់ខ្លួនសកម្មជនប្រជាធិបតេយ្យថៃលោក វ៉ាន់ឆាលឺម សាតស័ក្តិសិទ្ធ កាលពីឆ្នាំ២០២០ នៅកម្ពុជា មិនត្រូវបានលើកមកជជែក ឬក៏ជជែកក្រៅផ្លូវការ ក៏ប៉ុន្តែមិនត្រូវបានបញ្ចេញព័ត៌មាន៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
