សហរដ្ឋអាមេរិកបានសម្រេចផ្តល់ជូនឡើងវិញនូវទឹកប្រាក់ចំនួន១៨លានដុល្លារ តាមរយៈទីភ្នាក់ងារសម្រាប់អភិវឌ្ឍន៍អន្តរជាតិ(USAID) ដែលសហរដ្ឋអាមេរិកបានផ្អាកក្រោយការបោះឆ្នោតកាលពីថ្ងៃទី២៣ កក្កដា។ នេះបើតាមការគូសបញ្ជាក់របស់ក្រសួងការបរទេសកម្ពុជានៅក្នុងសេចក្តីប្រកាសព័ត៌មាន ស្តីពី ជំនួបរវាង លោកនាយករដ្ឋមន្ត្រី ហ៊ុន ម៉ាណែត និងលោកស្រី វ៉ិចតូរីយ៉ា នូលែន អនុរដ្ឋមន្ត្រីស្តីទី នៃក្រសួងការបរទេសអាមេរិកនៅថ្ងៃទី២២កញ្ញា ពេលដែលប្រមុខរដ្ឋាភិបាលកម្ពុជាទៅប្រជុំនៅអង្គការសហប្រជាជាតិ។
សូមបញ្ជាក់ថា ទាក់ទងនឹងការបោះឆ្នោតនៅកម្ពុជាថ្ងៃទី២៣កក្កដាកន្លងមក សហរដ្ឋអាមេរិក និងប្រទេសជាសម្ព័ន្ធមិត្ត មិនបានប្រកាសទទួលស្គាល់ការបោះឆ្នោតនៅកម្ពុជានេះឡើយ ដោយសារតែអវត្តមានគណបក្សប្រឆាំង។
បើតាមក្រសួងការបរទេសកម្ពុជា នៅក្នុងជំនួបរវាងលោក ហ៊ុន ម៉ាណែត និងលោកស្រី វ៉ិចតូរីយ៉ា នូលែន សហរដ្ឋអាមេរិកបានសារទចំពោះការជ្រើសតាំងលោក ហ៊ុន ម៉ាណែត ជានាយករដ្ឋមន្ត្រី និងគូសបញ្ជាក់ថា អាមេរិកស្វាគមន៍ឱកាសពង្រីកកិច្ចសហប្រតិបត្តិការទ្វេរភាគី តាមរយៈធ្វើការជិតស្និទ ដោយចង់ឃើញកម្ពុជាទទួលបានជោគជ័យ។
ដោយឡែកសហរដ្ឋអាមេរិកនៅតែបន្តស្នើឲ្យកម្ពុជាពន្លឿននីតិវិធីទទួលយកជនជាតិខ្មែរមកប្រទេសកំណើតវិញ ចំពោះពលរដ្ឋខ្មែរដែលធ្លាប់ត្រូវបានកាត់ទោសនៅសហរដ្ឋអាមេរិក។ ត្រង់ចំណុចនេះ ប្រមុខរដ្ឋាភិបាលកម្ពុជា បានឆ្លើយតបថា ក្រសួងពាក់ព័ន្ធរបស់កម្ពុជា នឹងពិនិត្យកែសម្រួលនីតិវិធីឲ្យបានឆាប់រហ័ស។ ក៏ប៉ុន្តែលោកស្នើទៅកាន់សហរដ្ឋអាមេរិកវិញ ឲ្យយកចិត្តទុកដាក់ពិសេសចំពោះពលរដ្ឋខ្មែរដែលត្រូវធ្វើមាតុភូមិនិវត្តន៍តែមានបញ្ហាសុខភាព។ ចំពោះការស្នើត្រឡប់ទៅវិញនេះ ត្រូវបានអនុរដ្ឋមន្ត្រីស្តីទីនៃក្រសួងការបរទេសអាមេរិក អះអាងថា នឹងបន្តយកចិត្តទុកដាក់។ នេះបើតាមសេចក្តីប្រកាសព័ត៌មានដដែលនេះ។
ចាប់តាំងពីការចុះកិច្ចព្រមព្រៀងរវាងកម្ពុជា និងអាមេរិក នៅក្នុងឆ្នាំ២០០២ រហូតមកទល់ពេលនេះ អាមេរិកបានបញ្ជូនពលរដ្ឋខ្មែរអាមេរិកកាំងដែលធ្លាប់ប្រព្រឹត្តបទឧក្រិដ្ឋនៅប្រទេសនេះ ឲ្យត្រឡប់មកកម្ពុជាវិញ ជាង៧០០នាក់ហើយ៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
