អ.ស.ប.បើកជំនួបកំពូលអាកាសធាតុនៃក្រុមអ្នកមានមហិច្ឆតាអាកាសធាតុពិតៗ
21-កញ្ញា-2023
លោកអគ្គលេខាធិការ អង្គការសហប្រជាជាតិ បានប្រមូលក្រុមប្រទេសដែលមានមហិច្ឆតាពិតៗក្នុងការប្រយុទ្ធប្រឆាំងនឹងការឡើងកម្តៅអាកាសធាតុ ឱ្យមកជួបជុំគ្នា បើកជំនួបកំពូលអាកាសធាតុមួយ នៅថ្ងៃពុធទី ២០កញ្ញានេះ។ ប៉ុន្តែដូចរាល់លើក ប្រទេសបញ្ចេញផ្សែងពុលខ្លាំងគេនៅលើពិភពលោក សហរដ្ឋអាមេរិកនិងចិន មិនបង្ហាញវត្តមានទេ។
ទោះបីជាមានបាតុភូតអាកាសធាតុកំណាច និងហួសហេតុកើនឡើងខ្លាំងយ៉ាងណាក៏ដោយ ក៏ការបញ្ចេញឧស្ម័នផ្ទះកញ្ចក់ដែលជាដើមហេតុនាំឡើងកម្តៅសីតុណ្ហភាពនៃភពផែនដី នៅបន្តកើនឡើងយ៉ាងខ្លាំងដដែល ហើយវិស័យថាមពលធ្យូងបានទទួលផលចំណេញកាន់តែច្រើនដល់កំរិតឯតទគ្គកម្មទៀត។ ក្នុងស្ថានភាពបែបនេះ លោកអគ្គលេខាធិការអង្គការសហប្រជាជាតិបានផ្តួចផ្តើមរៀបចំជំនួបកំពូលអាកាសធាតុ នៅថ្ងៃពុធនេះ ក្នុងទិសដៅសិក្សាអំពីគម្លាតរវាងវិបត្តិអាកាសធាតុនិងនយោបាយរបស់រដ្ឋាភិបាលនីមួយៗ។
ប៉ុន្តែដើម្បីបានទទួលការអនុញ្ញាតឱ្យចូលរួមក្នុងជំនួបកំពូល ប្រទេសនោះចាំបាច់ត្រូវមានសេចក្តីប្រកាសនិងផែនការបញ្ចេញសកម្មភាពជាក់លាក់ក្នុងការសម្រេចកិច្ចសន្យាប្រកបដោយមហិច្ឆតាដូចមានចែងក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥។ មានតែប្រទេសប្រកាន់មហិច្ឆតាពិតផ្នែកអព្យាក្រិត្យកាបូនតែប៉ុណ្ណោះដែលមានសិទ្ធិបញ្ចេញមតិយោបល់។ នេះបើតាមលក្ខខណ្ឌចែងដោយលោកអគ្គលេខាធិការអង្គការសហប្រជាជាតិ។
នៅល្ងាចមិញ អង្គការសហប្រជាជាតិបានផ្សព្វផ្សាយជាសាធារណៈបញ្ជីឈ្មោះសិស្សគំរូឱ្យចូលប្រជុំអាកាសធាតុ និងអ្នកអវត្តមានដ៏គួរឱ្យសម្គាល់ចម្បងពីរ គឺសហរដ្ឋអាមេរិក និងចិនដែលបញ្ចេញផ្សែងពុលច្រើនជាងគេបង្អស់នៅលើពិភពលោក។ ប្រធានាធិបតីអាមេរិកចូបៃដិន រវល់នៅក្នុងមហា សន្និបាតអ.ស.ប. នៅញូវយ៉ក ឯលោក ស៊ី ជីនពីង ប្រធានាធិបតីចិនមិនចេញពីប្រទេស ដើម្បីចូលរួមក្នុងអង្គមហាសន្និបាតប្រចាំឆ្នាំតែម្តង។
អង់គ្លេសក៏គ្មានក្នុងកម្មវិធីដែរ តែនាយករដ្ឋមន្ត្រី លោក ស៊ូ ណាក់ បានព្រលយនៅល្ងាចមិញថា ចង់ត្រលប់មកសម្រេចកម្មវត្ថុអព្យាក្រិត្យកាបូននៅឆ្នាំ២០៥០។ មានតែសហភាពអឺរ៉ុប ប្រេស៊ីល កាណាដា ឬអាហ្វ្រិកខាងត្បូង និងបារាំង ព្រមទាំងបណ្តាប្រទេសប្រឈមនឹងផលវិបាកអាកាសធាតុជួរមុខទេ ដែលអង្គការសហប្រជាជាតិអញ្ជើញឱ្យឡើងបង្ហាញនយោបាយអាកាសធាតុរបស់ខ្លួន។
លោកអគ្គលេខាធិការក៏បានអញ្ជើញសកម្មជនផ្សេងដែលមិនមែនជាតំណាងប្រទេស មានជាអាទិ៍អភិបាលក្រុងឡុងដ៍ និងអភិបាលរដ្ឋកាលីហ្វ័រនីញ៉ា។
ក្រុមអ្នកសង្កេតការណ៍រង់ចាំមើលមហិច្ឆតាអាកាសធាតុរបស់សហភាពអឺរ៉ុប-កាណាដា និងជាពិសេសរង់ចាំស្តាប់ពាក្យសន្យាផ្តល់ហិរញ្ញវត្ថសម្រាប់ជួយក្រុមប្រទេសងាយរងគ្រោះអាកាសធាតុ។ ការមិនគោរពកាតព្វកិច្ចជួយក្រុមប្រទេសកំពុងអភិវឌ្ឍន៍ ដែលប្រឈមនឹងវិបត្តិអាកាសធាតុ គឺជាចំណុចដ៏រសើបបំផុតនៃគ្រប់កិច្ចចរចាអន្តរជាតិស្តីពី អាកាសធាតុ និងបន្តក្លាយជារបៀបវារៈដ៏ចម្រូងចម្រាសជាថ្មីក្នុងសន្និសីទអាកាសធាតុ COP២៨ ខាងមុខ៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
