នៅថ្ងៃព្រហស្បតិ៍ ទី៧ កញ្ញា ថ្នាក់ដឹកនាំរបស់មូលនិធិរូបិយវត្ថុអន្តរជាតិ IMF និងធនាគារពិភពលោកបានប្រកាសពីការចង់ធ្វើការរួមគ្នាឲ្យកាន់តែជិតស្និទ្ធដើម្បីទប់ស្កាត់នឹងការគំរាមកំហែងដែលបង្កឡើងដោយការប្រែប្រួលអាកាសធាតុ។ ការប្រកាសនេះបានធ្វើឡើងនៅប៉ុន្មានថ្ងៃមុនកិច្ចប្រជុំកំពូល G២០ ដែលគ្រោងរៀបចំរយៈពេល ២ថ្ងៃដោយចាប់ផ្តើមពីថ្ងៃសៅរ៍ ទី៩ កញ្ញក្នុងប្រទេសឥណ្ឌា។
នៅក្នុងសេចក្តីប្រកាសព័ត៌មានរួម អគ្គនាយិកាមូលនិធិរូបិយវត្ថុអន្តរជាតិ IMF លោកស្រីគ្រីស្តាលីណា ហ្សកជីវ៉ា និងប្រធានធនាគារពិភពលោកលោកអាហ្យេ បង់ហ្កាបានថ្លែងថា ការប្រែប្រួលអាកាសធាតុគឺជាការគំរាមកំហែងដល់សន្តិភាពពិភពលោក សន្តិសុខ ស្ថិរភាពសេដ្ឋកិច្ច និងការអភិវឌ្ឍន៍។ ប្រឈមនឹងការគំរាមកំហែងដែលបង្កឡើងដោយការប្រែប្រួលអាកាសធាតុនេះ IMF និងធនាគារពិភពលោកត្រូវរួមដៃគ្នាដើម្បីជួយប្រទេសសមាជិកទាំងអស់ឱ្យធ្វើសមាហរណកម្មលើកម្មវត្ថុរបស់ពួកគេស្តីពី បញ្ហាអាកាសធាតុ និងការអភិវឌ្ឍន៍ នេះជាការបញ្ជាក់របស់លោកស្រីគ្រីស្តាលីណា ហ្សកជីវ៉ា និងប្រធានធនាគារពិភពលោកលោកអាហ្យេ បង់ហ្កា។
ការប្តេជ្ញាចិត្តរួមគ្នារបស់មូលនិធិរូបិយវត្ថុអន្តរជាតិ IMF និងធនាគារពិភពលោកបានធ្វើឡើង ខណៈពេលដែលកិច្ចប្រជុំកំពូល G២០ ត្រៀមបើកធ្វើរយៈពេល ២ថ្ងៃ ក្នុងប្រទេសឥណ្ឌាដោយចាប់ផ្តើមពីថ្ងៃសៅរ៍ ទី៩ កញ្ញា។ នៅក្នុងកិច្ចប្រជុំកំពូល G២០ រយៈពេល ២ថ្ងៃដែលនឹងមាន ១៩ប្រទេសបូកសហភាពអឺរ៉ុបចូលរួមការប្រែប្រួលអាកាសធាតុ ជាប្រធានរឿងអាទិភាពមួយមិនអាចខ្វះបាន និងដែលប្រទេសសមាជិក G២០ ទាំងអស់ត្រូវពន្លឿនការដោះស្រាយឲ្យបានលឿនបំផុត។ ក្រៅពីបញ្ហាអាកាសធាតុ អគ្គនាយិកា IMF លោកស្រីគ្រីស្តាលីណា ហ្សកជីវ៉ា និងប្រធានធនាគារពិភពលោកលោកអាហ្យេ បង់ហ្កាក៏បានសន្យាចាប់ដៃធ្វើការរួមគ្នា ដើម្បីជួយប្រទេសមួយចំនួនកុំឲ្យធ្លាក់ក្នុងស្ថានភាពងាយរងគ្រោះកាន់តែខ្លាំង ដោយសារជំពាក់បំណុលគេវ័នក។
កម្មវត្ថុចុងក្រោយរបស់ IMF និងធនាគារពិភពលោក លោកស្រី គ្រីស្តាលីណា ហ្សកជីវ៉ា និងលោក អាហ្យេ បង់ហ្កា បានប្រកាសពង្រឹងការគាំទ្រចំពោះប្រទេសនានា ដើម្បីទាញយកបាននូវអត្ថប្រយោជន៍ពីបច្ចេកវិទ្យាឌីជីថលថ្មីៗ ដោយបន្ថយហានិភ័យ ពិសេសពង្រឹងសុវត្ថិភាពលើមធ្យោបាយទូទាត់ឆ្លងប្រទេស៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
