ការនាំចេញចិនធ្លាក់ចុះខ្លាំង មិនធ្លាប់មានតាំងពីឆ្នាំ២០២០មក
10-សីហា-2023
ថ្វីបើសង្គ្រាមអ៊ុយក្រែនបានបង្ខិតប៉េកាំងឱ្យស្និទ្ធនឹងម៉ូស្គូ តាមរយៈសន្ទុះនាំចេញចិនយ៉ាងខ្លាំងកា្លទៅរុស្ស៊ីក៏ដោយ ក៏នៅខែកក្កដា២០២៣នេះ វិស័យនាំចេញបានធ្លាក់ចុះដល់កំរិតដ៏ទាបបំផុតដែលចិនមិនធ្លាប់ជួបប្រទះមកទេគិតតាំងពីឆ្នាំ២០២០មក។ ជាការធ្លាក់ចុះដែលបណ្តាលមកពីសេចក្តីត្រូវការនៅបរទេសចុះថយផង និងដោយហេតុតែសេដ្ឋកិច្ចក្នុងស្រុកដើរបន្ថយល្បឿនខ្លាំងផង។ វិស័យនាំចេញ ជាគន្លឹះនៃកំណើនសេដ្ឋកិច្ចចិន និងជះឥទ្ធិពលដោយផ្ទាល់នឹងទីផ្សារការងារប្រសិនបើការនាំចេញត្រូវបន្ថយល្បឿន។
ការធ្លាក់ចុះនៃវិស័យនាំចេញចិន មានកំរិតធ្ងន់ធ្ងរជាងការព្យាករទៅទៀត។ បើតាមតួលេខរបស់ស្ថាប័នពន្ធគយចិន កាលពីខែមិថុនាការនាំចេញបានធ្លាក់ចុះ១២,៤%ស្រាប់ទៅហើយ ហើយនៅខែកក្កដា ផលិតផលចិនសម្រាប់នាំទៅលក់នៅបរទេសបានបន្តធ្លាក់ចុះបន្ថែមទៀត ក្នុងកំរិត១៤,៥% (ទល់នឹងការព្យាករត្រឹម១៣,២%)។
នេះជាសកម្មភាពនាំចេញដ៏ទាបបំផុតដែលចិនមិនធ្លាប់ជួបប្រទះទេ គិតចាប់តាំងពីខែមករាឆ្នាំ២០២០មក ដែលកាលណោះសេដ្ឋកិច្ចចិនបានគាំងស្ទើរទាំងស្រុងដោយហេតុវិបត្តិកូវីដ១៩ និងទាញទម្លាក់ការនាំចេញអស់១៧,២%។
សម្រាប់ពេលនេះ ហានិភ័យប្រឈមនឹងសេដ្ឋកិច្ចដើរថយក្រោយនៅសហរដ្ឋអាមេរិកនិងនៅសហភាពអឺរ៉ុប បូកផ្សំនឹងវិបត្តិអតិផរណា ជាកត្តាមួយចូលរួមចំណែកបញ្ចុះតម្រូវការផ្នែកផលិតផលចិនរបស់អន្តរជាតិ។ ភាពតានតឹងផ្នែកភូមិសាស្ត្រនយោបាយជាមួយសហរដ្ឋអាមេរិក និងគំនិតកាត់បន្ថយភាពរំពឹងលើផលិតកម្មចិនរបស់ក្រុមប្រទេសលោកខាងលិច ជាចំណែកមួយទៀតដែលនាំការនាំចេញចិនត្រូវថយចុះ។
កាលពីឆ្នាំទៅ វិធានការប្រឆាំងកូវីដបានមកបង្អាក់វិស័យនាំចេញយ៉ាងខ្លាំង។ នៅទីបំផុត ចិនសម្រេចលុបបម្រាមទាំងស្រុងនៅខែធ្នូឆ្នាំ២០២២ ប៉ុន្តែសេដ្ឋកិច្ចនៅតែគ្មានសន្ទុះដូចក្តីរំពឹង។ អត្រាយុវជនអត់ការងារធ្វើឡើងខ្ពស់ដល់កំពូល តម្រូវការក្នុងស្រុកផុយស្រួយ ការនាំចូលក៏ថយចុះខ្លាំងដែរ ជាគម្រប់៩ខែជាប់គ្នា និងកាន់តែខ្លាំងពីមួយខែទៅមួយខែ (ថយ៦,៨%នៅខែមិថុនា ថយ១២,៤%នៅខែកក្កដា)។ កំណើនសេដ្ឋកិច្ចនៅរវាងត្រីមាសទី មួយ និងទីពីរកើនតែ០,៨%។ នេះបើតាមតួលេខផ្លូវការដែលបញ្ជាក់ថាសេដ្ឋកិច្ចចិនស្ទុះយ៉ាងត្រដរក្រោយវិបត្តិកូវីដ១៩។
ក្នុងខណៈដែលសេដ្ឋវិទូណែនាំឱ្យរៀបផែនការផ្តល់សន្ទុះសេដ្ឋកិច្ចដ៏ធំមួយ អាជ្ញាធរប៉េកាំងជ្រើសរើសចាត់វិធានការចោះៗនិងដៅលើវិស័យឯកជន ដែលពុំទាន់មានលទ្ធផលអ្វីទេនាពេលនេះ។ ចំណែកអ្នកវិភាគនៅធនាគារជប៉ុន ស្នើឱ្យចិនបញ្ចុះតម្លៃប្រាក់យ័នដែលតាមបច្ចេកទេសនឹងធ្វើឱ្យតម្លៃទំនិញចិនមានភាពប្រកួតប្រជែងខ្លាំងនៅបរទេស ដើម្បីជំរុញវិស័យនាំចេញ៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
