អង្គការសហប្រជាជាតិ ៖ ពិភពលោកត្រូវត្រៀមរៀងៗខ្លួន ប្រឈមនឹងរលកកម្តៅខ្លាំង
19-កក្កដា-2023
អង្គការសហប្រជាជាតិ បានអំពាវនាវប្រាប់នៅថ្ងៃអង្គារទី ១៨ កក្កដានេះ ឱ្យពិភពលោកត្រៀមប្រឈមនឹងរលកកម្តៅខ្លាំង។ មនុស្សម្នាក់ៗត្រូវចេះរៀបចំផែនការរៀងៗខ្លួន ក្នុងការប្រយុទ្ធប្រឆាំងនឹងកម្តៅសីតុណ្ហភាពឡើងខ្ពស់ហួសហេតុ នៅពេលថ្ងៃ និងនៅពេលយប់។ អ្នកជំនាញអាកាសធាតុអង្គការសហប្រជាជាតិព្រួយបារម្ភជាពិសេសនឹងរលកកម្តៅនៅពេលយប់ ដែលអាចប៉ះពាល់ខ្លាំងដល់សុខភាព។
ពិភពលោកនឹងបន្តជួបបាតុភូតអាកាសធាតុឡើងក្តៅខ្លាំង កាន់តែយូរ កាន់តែញឹកញាប់។ បាតុភូតធម្មជាតិអែលនីញ៉ូ បានមកបន្ថែមឱ្យមានរលកកម្តៅកាន់តែញយនិងកាន់តែអាក្រក់។ នេះបើតាមប្រសាសន៍របស់អ្នកជំនាញនៃអង្គការអាកាសធាតុអង្គការសហប្រជាជាតិ ដោយរំឮកថា គិតចាប់តាំងពីឆ្នាំ១៩៨០មក ចំនួនរលកកម្តៅនៅអឌ្ឍគោលខាងជើងបានកើនឡើង៦ដង។ ហើយគ្មានសញ្ញាឬនិន្នាការធ្លាក់ចុះសោះ។
ដោយយល់ថារលកកម្តៅបច្ចុប្បន្នគ្រាន់តែជាការចាប់ផ្តើម អ្នកជំនាញអាកាសធាតុអង្គការប្រជាជាតិ លោក John Nairn បានអំពាវនាវឱ្យមនុស្សគ្រប់រូបចេះមានទំនួលខុសត្រូវបង្កើតផែនការប្រយុទ្ធប្រឆាំងនឹងភាពក្តៅហួសហេតុ។ បុគ្គលម្នាក់ៗអាចបញ្ចេញសកម្មភាពទប់ស្កាត់ការប្រែប្រួលអាកាសធាតុដោយឈប់ប្រើប្រាស់ថាមពលផូស៊ីល (ធ្យូង- ហ្កាស-សាំង-ម៉ាហ្សូត …) ដោយងាកមកប្រើថាមពលអគ្គិសនីបៃតងសុទ្ធសាធ។ នេះជាយោបល់ផ្ទាល់ខ្លួនរបស់អ្នកជំនាញដដែល។
បើតាមអ្នកជំនាញ ឧស្ម័នផ្ទះកញ្ចក់ ដែលជាអ្នកខ្ទប់កម្តៅ ជាប្រភពនាំឱ្យមានការប្រែប្រួលអាកាសធាតុ។ នៅពេលខ្យល់បរិយាកាសមានលំនឹងល្អ ផែនដីមានសីតុណ្ហភាពល្មមសម្រាប់ជីវិត។ ប៉ុន្តែនៅពេលបរិមាណឧស្ម័នផ្ទះកញ្ចក់ ដែលរួមមានឧស្ម័នកាបូនិក មេតាន អាហ្សូត ឡើងខ្ពស់ជ្រុលក្នុងបរិយាកាស វានឹងឃុំខ្ទប់កម្តៅកាំរស្មីព្រះអាទិត្យមិនឱ្យចាំងផ្លាតទៅក្នុងអវកាសវិញ ទើបបង្កើតឱ្យមានការឡើងកម្តៅសីតុណ្ហភាពទូទៅផង និងបង្កឱ្យមានបាតុភូតអាកាសធាតុមិនប្រក្រតីផ្សេងទៀតផង។
នៅពេលមានរលកកម្តៅឡើងខ្ពស់ខ្លាំង សហគមន៍អន្តរជាតិផ្តោតចំណាប់អារម្មណ៍ខ្លាំងលើសីតុណ្ហភាពអតិបរមាពេលថ្ងៃពេញអំណាច តែបើតាមអង្គការអាកាសធាតុអង្គការសហប្រជាជាតិ គឺសីតុណ្ហភាពពេលយប់ ដែលអាចបង្កហានិភ័យសម្រាប់សុខភាព។ អ្នកជំនាញ ពន្យល់ថា កម្តៅពេលយប់ខ្ពស់ខ្លាំង យូរថ្ងៃជាប់ៗគ្នា អាចជាគ្រោះថ្នាក់សម្រាប់មនុស្សគ្រប់រូប ជាពិសេសមនុស្សទន់ខ្សោយ ព្រោះសរីរាង្គកាយមិនអាចសម្រាកប្រមូលកម្លាំងវិញបាន ដោយអាចបង្កើនគ្រោះគាំងបេះដូង និងគ្រោះមរណៈ។
ពុំទាន់មាននិយមន័យកំណត់កំរិតសីតុណ្ហភាព នៃពាក្យថារលកកម្តៅខ្លាំងទេ។ គឺអាស្រ័យទៅលើសីតុណ្ហភាពមធ្យមនៃតំបន់នីមួយៗ។ ប៉ុន្តែអង្គការអាកាសធាតុអង្គការសហប្រជាជាតិកំពុងរៀបចំវាក្យសព្ទនិងនិយមន័យនៃភាពក្តៅជ្រុល សម្រាប់ប្រើជាបទដ្ឋានព្យាករនិងទាញសញ្ញាអាសន្នប្រាប់ពិភពលោក៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
