ក្នុងរយៈពេល​២០ឆ្នាំចុងក្រោយនេះ ​កម្ពុជាបាន​ស្គាល់អត្រា​កំណើន​​ប្រជាជនប្រចាំឆ្នាំចំនួន​ ​១.៦ភាគរយ ដោយ​នៅឆ្នាំ២០២២ កម្ពុជាមានប្រជាជនសរុប​ ១៦.៨លាននាក់ ដែលជាង៥០ភាគរយជា​​ស្ត្រី​។ នៅក្នុងឱកាសទិវា​ប្រជាជនពិភពលោក​លើកទី​៣៤ នៅថ្ងៃទី​១១កក្កដានេះ លោកនាយករដ្ឋមន្ត្រី ហ៊ុន សែន​ លើកឡើងថា កម្ពុជា​កំពុងស្ថិតនៅក្នុង​បរិបទ​អត្រាកំណើនប្រជាសាស្ត្រមួយ​ល្អប្រសើរសម្រាប់ការអភិវឌ្ឍសង្គមជាតិ​ ប៉ុន្តែ​កម្ពុជានៅតែ​មានបញ្ហា​ប្រឈមមួយចំនួនចំពោះស្ត្រី ដែលបន្តមានអត្រាមរណៈមាតាកម្រិត​ខ្ពស់​នៅក្នុងតំបន់។

សារលិខិត​ដែលមានកម្រាស់៥ទំព័រ ក្នុងទិវា​ប្រជាជនពិភពលោកលើកទី៣៤ ឆ្នាំ២០២៣ លោក ហ៊ុន សែន បានលើកឡើងថា ទោះ​កម្ពុជាស្ថិត​ក្នុងបរិបទអត្រាកំណើនប្រជាសាស្ត្រមួយល្អប្រសើរ ប៉ុន្តែ​​កម្ពុជានៅតែមានបញ្ហាប្រឈម​មួយចំនួនចំពោះស្ត្រី​ ដូចជាអត្រាមរណភាព​មាតា។ តាមតួលេខនៅកម្ពុជា អត្រាមរណភាពមាតា​នៅក្នុងឆ្នាំ​២០២១-២០២២ មានចំនួន​១៥៤នាក់ ក្នុង១សែនកំណើតរស់ ​ជាតួលេខថយចុះ ដែលនៅឆ្នាំ ២០០៨ មានចំនួន​​​១៧០នាក់ ក្នុង១សែនកំណើតរស់​។ ជាការធ្លាក់ចុះនៃអត្រា​មរណភាពមាតា​ ប៉ុន្តែ​​នៅតែជា​កម្រិតខ្ពស់ បើធៀបជាមួយ​បណ្តាប្រទេស​ក្នុងតំបន់។​

បញ្ហាប្រឈម​ផ្សេងរបស់ស្ត្រី​ផ្សេងទៀតគឺ​ ​សេវាសុខភាព​បន្តពូជរបស់​ស្ត្រីមិនទាន់គ្រប់ដណ្តប់​ជាសកល។ ចំណែក​កម្លាំងពលកម្មស្ត្រីមានច្រើន ​តែស្ត្រីជាច្រើនបែរជាធ្វើការងារគ្មានប្រាក់កម្រៃ​ ឬ ការងារមានប្រាក់ចំណូលទាប​។ កម្រិតវប្បធម៌​ និងជំនាញ​បច្ចេកទេស​របស់ស្ត្រីមានកម្រិតទាប មិនទាន់ឆ្លើយ​តប​តម្រូវការទីផ្សារនិងវិស័យអាទិភាព គម្លាត​យេនឌ័រក្នុងសង្គម និងការជួញដូរ​ និងអំពើហឹង្សា​លើស្ត្រី​និងក្មេងស្រីនៅតែបន្តមាន។

ដើម្បីដោះស្រាយបញ្ហាប្រឈមរបស់ស្ត្រី​ដូចជា ​បញ្ហាសុខភាព ការអប់រំ ការរំលោភបំពាន​ និងសិទ្ធិនៃការចូលរួម​ និងសិទ្ធិ​ក្នុងការសម្រេចចិត្ត​ជាដើមនេះ​ លោក ហ៊ុន សែន អះអាងថារដ្ឋាភិបាលកម្ពុជា​បាននិង​កំពុង​បញ្ជ្រាបយេនឌ័រ​ទៅ ក្នុងគោលនយោ​បាយខ្លួន​ ក្នុង​ផែនការ​​អភិវឌ្ឍន៍ជាតិ​និងផែនការយុទ្ធសាស្ត្រ​ និងសកម្មភាពបញ្ជ្រាបយេនឌ័រ​នៅគ្រប់ក្រសួងស្ថាប័ន និងការអនុវត្ត​អនុសញ្ញាស្តីពីការលុបបំបាត់​រាល់ទម្រង់​រើសអើង​ប្រឆាំងនារីភេទ។