អារ៉ាប៊ីសាអូឌីត និងរុស្ស៊ី បន្តកំរិតការផ្គត់ផ្គង់ទីផ្សារប្រេងឆៅ
4-កក្កដា-2023
អារ៉ាប៊ីសាអូឌីត ប្រទេសនាំចេញប្រេងឆៅ លេខមួយនៅលើពិភពលោក បានប្រកាសនៅថ្ងៃចន្ទទី ៣ កក្កដា២០២៣ បន្តកាត់បន្ថយផលិតកម្មបូមប្រេង មួយថ្ងៃ១លានធុង តទៅទៀត ដើម្បីលើកកម្ពស់តម្លៃប្រេងនៅលើទីផ្សារ។ គ្រាន់តែបានឮសេចក្តីសម្រេចរបស់អារ៉ាប៊ីសាអូឌីតភ្លាម រុស្សីក៏បានប្រកាសកាត់បន្ថយការនាំចេញប្រេងឆៅដែរ សម្រាប់ខែសីហាខាងមុខ ក្នុងបរិមាណ៥សែនធុងក្នុងមួយថ្ងៃ។
កាលពីខែមិថុនា អារ៉ាប៊ីសាអូឌីតបានសម្រេចចិត្តបន្ថយផលិតកម្មបូមប្រេង ១លានធុងបារីលក្នុងថ្ងៃ ដោយសង្ឃឹមថានឹងធ្វើឱ្យតម្លៃប្រេងឡើងខ្ពស់បន្តិច។ ការសម្រេចបន្ថយបរិមាណផលិតដោយចេតនានេះ បានចូលជាធរមាននៅចុងសប្តាហ៍ ហើយនឹងបន្តដល់ខែសីហា ឬអាចយូរខែទៅមុខទៀត។ នេះបើតាមភ្នាក់ងារសារព័ត៌មានផ្លូវការរបស់រាជាណាចក្រ ដោយផ្អែកលើប្រភពមកពី ក្រសួងថាមពលអារ៉ាប៊ីសាអូឌីត។ ដូច្នេះជាសរុបទៅ អារ៉ាប៊ីសាអូឌីត កំរិតការបូមប្រេងត្រឹមប្រមាណ៩លានធុងបារីលក្នុងមួយថ្ងៃ។
វិធានការរបស់អារ៉ាប៊ីសាអូឌីតនេះ ក៏ជាការពង្រឹងសេចក្តីសម្រេចចិត្តរបស់ក្រុមប្រទេសផលិតប្រេង Opep+ ដែលមានបំណងបញ្ចុះផលិតកម្មប្រេងឆៅដើម្បីទ្រទ្រង់ទីផ្សារឱ្យមានស្ថិរភាពនិងលំនឹងដែរ។ កាលពីខែមេសា ក្រុមប្រទេសជាសមាជិកអង្គការប្រទេសអ្នកនាំប្រេងចេញ Opep+ ជាច្រើនប្រកាសដោយភ្ញាក់ផ្អើលកាត់បន្ថយផលិតកម្មបូមប្រេងចំនួនជាង១លានធុងក្នុងមួយថ្ងៃ ដោយបានធ្វើឱ្យទីផ្សារប្រេងឡើងថ្លៃភ្លាមមួយរំពេចតែមិនបានយូរ។
បន្ទាប់ពីអារ៉ាប៊ីសាអូឌីត រុស្ស៊ីបានប្រកាសភ្លាមដែរនៅថ្ងៃចន្ទនេះ កាត់បន្ថយការនាំចេញប្រេងឆៅ (មិនមែនការផលិតទេ) មិនផ្គត់ផ្គង់ទីផ្សារ ចំនួន៥សែនធុងក្នុងមួយថ្ងៃ នៅខែសីហា និងជាវិធានការដែលអាចបន្តរហូតដល់ដំណាច់ឆ្នាំ២០២៤។ តាំងពីចូលធ្វើសង្គ្រាមនៅអ៊ុយក្រែនមក រុស្ស៊ីបានបង្វែរទិសនៃការនាំចេញប្រេងឆៅពីអឺរ៉ុប ទៅកាន់ប្រទេសចិននិងឥណ្ឌា។
ប៉ុន្តែសេចក្តីសម្រេចរបស់អារ៉ាប៊ីសាអូឌីត និងរុស្ស៊ី នៅថ្ងៃនេះ មានឥទ្ធិពលតិចតួចណាស់លើទីផ្សារប្រេង។ ប្រេងឆៅនៅទីផ្សារអឺរ៉ុបបានឡើងថ្លៃប្រមាណ០,៩៨% ឬត្រូវជាប្រមាណ៧៦,១៥អឺរ៉ូ ក្នុងមួយធុង និងនៅអាមេរិកឡើង ១,០២% ឬត្រូវជា៧១,៣៦ដុល្លារក្នុងមួយធុង ទល់នឹង១៤០ដុល្លារ កាលពីខែមីនាឆ្នាំ២០២២។
បើតាមអ្នកវិភាគ អារ៉ាប៊ីសាអូឌីត ត្រូវការឃើញតម្លៃប្រេងឆៅនៅទីផ្សារពិភពលោកមានតម្លៃមួយធុង ៨០ដុល្លារ ទើបអាចមានលំនឹងថវិកា។ ជាប្រទេសនាំចេញប្រេងដ៏ធំជាងគេនៅលើពិភពលោក អារ៉ាប៊ីសាអូឌីត រំពឹងលើការលក់ប្រេងបានថ្លៃ ដើម្បីមានលុយឧបត្ថម្ភកម្មវិធីធ្វើកំណែទម្រង់សេដ្ឋកិច្ចនាំប្រទេសដើរចេញពីថាមពលផូស៊ីល៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
