ថ្ងៃព្រហស្បតិ៍ ​​អង់គ្លេស បានប្រកាស​​បញ្ជាក់ជំហរជាថ្មី អំ​ពីការ​គាំទ្រកំណែទម្រង់ និង​បន្ថែម​ចំនួន​រដ្ឋសមាជិក​ នៅក្នុង​ ក្រុមប្រឹក្សាសន្តិសុខនៃអង្គការ សហប្រជាជាតិ (អ.ស.ប.)។ ក្នុង​ន័យ​រក្សា​សុវត្ថិភាពសន្តិសុខ​ពិភពលោក និង​រក្សាគោលការណ៍​ពិភពលោក​ពហុ​និយម​ឲ្យ​រឹង​មាំ ​​រដ្ឋមន្ត្រី​ក្រសួង​កិច្ចការបរទេស​ បាន​ថ្លែង​គាំទ្រ​ឲ្យ​ដាក់​បញ្ចូល​ប្រទេស ចំនួន​ ៥ បន្ថែមទៀត ចូល​ជា​សមាជិក​អចិន្ត្រៃយ៍​ នៃ​ ក្រុមប្រឹក្សាសន្តិសុខ​​។​

យើង​ចង់​ឃើញ ប្រទេស​អាហ្វ្រិក​ ចូល​ជា​​សមាជិក​​អចិន្ត្រៃយ៍ របស់​ ក្រុមប្រឹក្សាសន្តិសុខ។ ជាមួយ​នឹងគ្នា​នេះ អង់គ្លេស​ ​ក៏​ចង់​បាន ឥណ្ឌា ប្រេស៊ីល អាល្លឺម៉ង់ និង​ ជប៉ុន​ ចូល​សមាជិក​អចិន្ត្រៃយ៍​​ ​ដែរ។ នេះ​បើតាម​ប្រសាសន៍ ​របស់​​ប្រមុខ​ការទូត​អង់គ្លេស លោក James Cleverly ដោយ​​បញ្ជាក់ទៀតថា ចង់​បាន​ប្រព័ន្ធ​អន្តរជាតិ​ពហុនិយម និងរឹងមាំ​ អាច​ឆ្លើយ​តប​នឹង​សភាពការណ៍​​វិបត្តិ​ពិភពលោក​ឲ្យបាន​លឿន​រហ័ស​ទាន់​ពេល ហើយនិង​ មិន​ទុក​ប្រទេស​ណាមួយ​ឲ្យ​នៅ​ឯកា។​

ការ​លើកឡើងជា​ថ្មី​​នេះ ពុំ​មែន​ជា​ជំហរ​ថ្មី​របស់​អង់គ្លេសទេ​ ដ្បិត​ថា ​ច្រើ​នលើក​ច្រើន​សា​មកហើយ ដែល ​រដ្ឋាភិបាល​ទីក្រុង​ឡុងដ្រឺ​ អំពាវនាវ​ជំរុញ​ឲ្យ​បញ្ចូល​សមាជិក​ថ្មី ទាំង​អចិន្ត្រៃយ៍ក្តី​ និង​ទាំង​មិន​អចិន្ត្រៃយ៍ក្តី​ ទៅក្នុងរង្វង់​​ក្រុមប្រឹក្សាសន្តិសុខ។

កាលពីឆ្នាំទៅមិញ​​ ចាប់តាំ​ង​ពី​​​ផ្ទុះ​សង្គ្រាម​ឈ្លាន​ពាន​រុស្ស៊ីនៅ​អ៊ុយក្រែន ​ ដែល ​រុស្ស៊ី​ ជា​សមាជិក​អចិន្ត្រៃយ៍​ក្រុមប្រឹក្សាសន្តិសុខ គឺ​កាន់តែ​រុញ​សន្ទុះ​ជំរុញ​ឲ្យ​ ប្រទេស​ជា​ច្រើន ​ទាមទារ​ឲ្យ​សើរើ​កែទម្រង់ស្ថាប័នអ.ស.ប.​។​ ជាពិសេស​ ក្រុមប្រឹក្សាសន្តិសុខ ដែល​គេ​ចង់​ឲ្យ​បង្កើន​ចំនួន​សមាជិក​រហូត​ដល់ ២៥ប្រទេស។ ឆ្នាំទៅមិញ ​ប្រទេស​​ក្នុង​សម្ព័ន្ធ​សហភាព​អាហ្វ្រិក ក៏​បាន​ស្នើ​ឲ្យ​បញ្ចូល​តំណាង​ប្រទេស​អាហ្វ្រិក ទៅក្នុង​សមាជិក​អចិន្ត្រៃយ៍ នៃ ក្រុមប្រឹក្សាសន្តិសុខ ដែរ​។

សព្វថ្ងៃ​នេះ​ ក្រុមប្រឹក្សាសន្តិសុខ មាន​សមាជិក ​១៥ ប្រទេស ដែល​ក្នុងនោះ​ មានតែ​​ រដ្ឋ​សមាជិក​អចិន្ត្រៃយ៍ ចំនួន ៥ ប៉ុណ្ណោះ ដែល​មា​នឯកសិទ្ធិពិសេស ​បោះឆ្នោត​វេតូ គឺ អង់គ្លេស បារាំង សហរដ្ឋអាមេរិក រុស្ស៊ី និង​ ចិន ហើយ​និង​មាន​ រដ្ឋសមាជិក​ ១០ ទៀត ជា​សមាជិក​មិន​អចិន្ត្រៃយ៍ដោយ​ប្រទេស​ ៥  ត្រូវ​​​​​ផ្លាស់ប្តូរចេញ​ រៀងរាល់​​ ២ឆ្នាំ​ម្តង​។

សូម​ជ្រាប​ដែរថា ​ក្នុង​អាណត្តិ​ដឹកនាំ អ.ស.ប. ២ជំនាន់ ​ អតីតអគ្គលេខធិការ Kofi Annan ​ ​​​លោកបាន​គាំទ្រ​ឲ្យ​កែទម្រង់​និងចង់​ឲ្យ​​បន្ថែម​ចំនួន​សមា​ជិក​​ថ្មី​​ដែរ ប៉ុន្តែកាលណោះ សហរដ្ឋអាមេរិក ចិន និង រុស្ស៊ី បាន​បដិសេធ​តាំង​តែ​ពី​ដំបូង​ដៃមកម្ល៉េះ។​

ចំពោះ​រដ្ឋបាល​ក្រុង​ឡុងដ្រឺ ក្រៅតែ​ពី​អំពាវនាវ​​ឲ្យ​ថែម​សមាជិក​ទៅក្នុង​ក្រុម​ប្រឹក្សា​សន្តិសុខ រដ្ឋមន្ត្រីការបរទេស​អង់គ្លេស​ James Cleverly ក៏​លើកឡើង​ដែរ ពី​ការចង់​ឲ្យ​​កែប្រែ​ស្ថាប័ន​ហិរញ្ញវត្ថុ​អន្តរជាតិ និង​ អង្គការ​ពាណិជ្ជកម្ម​ពិភពលោក ដែល​ លោកប្រមុខ​ទូត​ យល់ឃើញ​ថា មាន​បទដ្ឋាន​ច្បាប់ខ្លះ និង​របៀបធ្វើការ​មួយ​ចំនួន​ ហាក់ដើរ​មិនទាន់​សភាពការណ៍​សោះ​៕​

ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh