ក្រុមហ៊ុនប្រេងអារ៉ាប៊ីសាអូឌីតយល់ព្រមទិញភាគហ៊ុនចំនួន១០% របស់ក្រុមហ៊ុនប្រេងចិន
30-មីនា-2023
ជំនួញប្រេងរវាងអារ៉ាប៊ី សាអូឌីតនិងប្រទេសចិន កាន់តែរីកធំ ជាលំដាប់។ នៅថ្ងៃចន្ទ Aramco ក្រុមហ៊ុនប្រេងអារ៉ាប៊ី សាអូឌីត ដែលជាក្រុមហ៊ុននាំចេញប្រេងធំជាងគេនៅក្នុងពិភពលោក បានប្រកាសថា ក្រុមហ៊ុនយល់ព្រមទិញភាគហ៊ុន១០%របស់ក្រុមហ៊ុនប្រេងចិន RongSheng។ កិច្ចព្រមព្រៀងទិញភាគហ៊ុនក្រុមហ៊ុនចិន សបញ្ជាក់ពីជំនឿទុកចិត្តរបស់អារ៉ាប៊ី សាអូឌីត ប្រទេសមហាសេដ្ឋីប្រេង ទៅលើភាពរឹងមាំនៃវិស័យនាំចូលប្រេងរបស់ចិន។
នៅក្នុងសេចក្តីថ្លែងការណ៍កាលពីថ្ងៃចន្ទ ក្រុមហ៊ុនប្រេងដ៏ធំជាងគេរបស់អារ៉ាប៊ី សាអូឌីតអះអាងថា ការយល់ព្រមព្រៀងទិញភាគហ៊ុនរបស់ក្រុមហ៊ុនប្រេងចិន Rongsheng ឆ្លុះបញ្ចាំងពីការធ្វើជំនួញយូរអង្វែងរបស់ក្រុមហ៊ុនប្រេងអារ៉ាប៊ី សាអូឌីត ជាមួយប្រទេសចិន។ ក្រុមហ៊ុនAramco របស់អារ៉ាប៊ីសាអូឌីតទើបប្រកាសទទួលបានប្រាក់ចំណេញពីការលក់ប្រេង ប្រមាណ ១៦១ពាន់លានដុល្លារ ពោលគឺ កើនឡើង ៤៦% នៅឆ្នាំ២០២២។
ការប្រកាសទិញភាគហ៊ុន១០%របស់ក្រុមហ៊ុនប្រេងចិន ដែលមានតម្លៃជាង ៣ពាន់លានដុល្លារ ជាលទ្ធផលនៃការយល់ព្រមព្រៀងគ្នា តាំងពីឆ្នាំ ២០១៨ រវាងក្រុមហ៊ុនប្រេងអារ៉ាប៊ីសាអូឌីត Aramco និងអាជ្ញាធរចិននៅខេត្ត Zhejiang (ភាគខាងកើតប្រទេសចិន)។ មួយវិញទៀត ដោយចុះកិច្ចព្រមព្រៀងទិញ ភាគហ៊ុនរបស់ក្រុមហ៊ុនប្រេងចិន ក្រុមហ៊ុនប្រេង Aramco របស់អារ៉ាប៊ីសាអូឌីត ត្រូវធានាផ្គត់ផ្គង់ លក់ប្រេងប្រមាណ ៤៨០ ០០០បារីល ក្នុងមួយថ្ងៃ ទៅឲ្យក្រុមហ៊ុនចិន សម្រាប់រយៈពេល ២០ឆ្នាំ។
ការប្រកាសទិញភាគហ៊ុនរបស់ក្រុមហ៊ុនចិន ធ្វើឡើងនៅមួយថ្ងៃក្រោយ ដែលក្រុមហ៊ុនប្រេង អារ៉ាប៊ីសាអូឌីត ដដែលចុះកិច្ចសន្យាចូលរួមជាមួយក្រុមហ៊ុនរដ្ឋចិនចំនួន ពីរ ដើម្បី សាងសង់រោងចក្រចម្រាញ់ប្រេង និងរោងចក្រចម្រាញ់សារធាតុគីមីចេញពីប្រេង នៅខេត្ត Liaoning ដែលនឹងអាចចាប់ដំណើរការ នៅឆ្នាំ ២០២៦។
នេះជាលើកទី១ ដែលអារ៉ាប៊ីសាអូឌីតបានប្រកាសពីកិច្ចព្រមព្រៀងដ៏ធំ គិតចាប់តាំង ទស្សនកិច្ចរបស់ប្រធានាធិបតីចិន នៅរីយ៉ាដ កាលពីខែធ្នូ ចុងឆ្នាំ មុន ដែលនៅក្នុងនោះ ប្រមុខរដ្ឋចិនបានអំពាវនាវឲ្យមានការដោះដូរលក់ប្រេង ដោយប្រើលុយយ័ន។ ម្យ៉ាង វាធ្វើឡើងនៅប៉ុន្មានសប្តាហ៍ក្រោយ ដែលចិនចូលរួមជួយ សម្របសម្រួលឲ្យអារ៉ាប៊ីសាអូឌីត និងអ៊ីរ៉ង់ និយាយចុះសម្រុង ភ្ជាប់ចំណងការទូតនឹងគ្នាឡើងវិញ។
ការវិនិយោគរបស់ក្រុមហ៊ុនប្រេងអារ៉ាប៊ី សាអូឌីត ដែលបញ្ជាក់ពីទំនាក់ទំនងកាន់តែជិតស្និទ្ធិរវាងរីយ៉ាដ និងប៉េកាំងបានធ្វើឲ្យអាមេរិក ដែលជាសម្ព័ន្ធមិត្តចាស់ឆ្នាំ របស់អារ៉ាប៊ីសាអូឌីត ព្រួយបារម្ភពីបញ្ហាអសន្តិសុខ។ ប៉ុន្តែ អារ៉ាប៊ី សាអូឌីត ក៏ដូចជាអេមេរ៉ាតអារ៉ាប់រួម បានបង្ហាញជំហរហើយថា ពួកគេមិនជ្រើសរើសភាគីជម្លោះណាទាំងអស់។ ផ្ទុយទៅវិញប្រទេសមហាសេដ្ឋីប្រេងទាំងពីរនឹងបង្កើនដៃគូធ្វើជំនួញ ដើម្បីផលប្រយោជន៍សេដ្ឋកិច្ច និងសន្តិសុខជាតិរបស់ខ្លួន។
ដោយបង្កើនការផ្គត់ផ្គង់ប្រេងទៅឲ្យក្រុមហ៊ុនចិន អារ៉ាប៊ីសាអូឌីតនឹងត្រូវប្រកួតប្រជែងខ្លាំងជាមួយរុស្ស៊ី ដែលជាសម្ព័ន្ធមិត្ត នៅក្នុងក្រុមប្រទេសនាំចេញប្រេង។ ដើម្បីគេចចេញពីការដាក់ទណ្ឌកម្មសេដ្ឋកិច្ចរបស់លោកខាងលិច ដោយសារសង្រ្គាមឈ្លានពានអ៊ុយក្រែន រុស្ស៊ី បានបង្វែរការលក់ប្រេងរបស់ខ្លួន ភាគច្រើន នៅក្នុងតម្លៃថោក ទៅកាន់ទីផ្សារលក់ប្រេងនៅប្រទេសចិន។ ជាក់ស្តែង នៅពីរខែ ដើមឆ្នាំនេះ រុស្ស៊ី បានដណ្តើមកន្លែងរបស់អារ៉ាប៊ី សាអូឌីត ក្នុងនាមអ្នកផ្គត់ផ្គង់លក់ប្រេងច្រើនជាងគេទៅឲ្យប្រទេសចិន៕
ប្រភពព័ត៌មាន៖ វិទ្យុបារាំងអន្តរជាតិ RFI https://www.rfi.fr/kh
អត្ថបទពាក់ព័ន្ធ
