ថ្មីៗនេះ រឿងអាស្រូវមួយបានផ្ទុះឡើង ពាក់ព័ន្ធនឹងក្រុមហ៊ុនប្រេងអាមេរិកដ៏ធំ ឈ្មោះExxonMobil ដែលត្រូវបានទស្សនាវត្តី Science ចុះផ្សាយថា បានភូតកុហក ថាបម្រែបម្រួលអាកាសធាតុសកល មិនមែនបណ្តាលមកពីឧស្ម័នផ្ទះកញ្ចក់ ដែលកើតចេញពីចំហេះប្រេង ឧស្ម័ន ឬធ្យូងថ្មនោះទេ។ ទស្សនាវត្តី Science អះអាងថា ការពិតអ្នកវិទ្យាសាស្ត្ររបស់ក្រុមហ៊ុន ExxonMobil បានស្រាវជ្រាវនិងសន្និដ្ឋានដឹង តាំងតែពីទសវត្សឆ្នាំ៧០ម្លេះ ថាប្រភពថាម ពលហ្វូស៊ីល គឺជាកត្តាបង្កវិបត្តិអាកាសធាតុ។ ថ្លែងនៅក្នុងវេទិកាសេដ្ឋកិច្ច នៅក្រុងដាវ៉ូស កាលពីថ្ងៃពុធ ទី១៨មករា លោកអគ្គលេខាធិការអង្គការ សហប្រជាជាតិ បានអំពាវនាវ ថាត្រូវតែផ្តន្ទាទោសក្រុមហ៊ុនប្រេង ដែលនិយាយកុហកពិភពលោក។
នៅវេទិកាសេដ្ឋកិច្ចសកលោក ដែលធ្វើជារៀងរាល់ឆ្នាំនៅក្រុងដាវ៉ូសប្រទេសស្វ៊ីស លោកអង់តូនីញ៉ូ ហ្គូតទែរស៍ បានថ្លែងដោយកំហិងថា ក្រុមហ៊ុនរកស៊ីផលិតនិងលក់ថាមពលហ្វូស៊ីលខ្លះ ដឹងតាំងតែពីទសវត្សឆ្នាំ៧០ម្លេះ ថាផលិតផលរបស់ខ្លួន នឹងដុតផែនដីយើងឲ្យឆាបឆេះ។ ក៏ប៉ុន្តែពួកក្រុមហ៊ុនឧស្សា ហកម្មអស់ទាំងនេះ គ្មានមនសិកាទេ ដោយបានព្យាយាមនិយាយកុហក បំភ្លៃការពិត។
សូមបញ្ជាក់ថា កាលសប្តាហ៍មុននេះ ទស្សនាវត្តី Science បានចុះផ្សាយថា តាំងតែពីដើមទសវត្សឆ្នាំ៨០ម្លេះ ដែលក្រុមហ៊ុនExxonMobil មានទិន្នន័យវិទ្យាសាស្ត្រព្យាករណ៍យ៉ាងប្រត្យក្ស ធ្វើឡើងអ្នកវិទ្យាសាស្ត្ររបស់ក្រុមហ៊ុននេះផ្ទាល់ ស្តីអំពីដំណើរវិវឌ្ឍន៍នៃវិបត្តិអាកាសធាតុ ដែលកាន់តែធ្ងន់ធ្ងរទៅ នៅរវាងប៉ុន្មានទសវត្សខាងមុខ។ ជាការព្យាករណ៍ដែលត្រឹមត្រូវបំផុត ប្រសិនបើយើងក្រឡេកមើលស្ថានភាពវិបត្តិអាកាសធាតុ នាពេលបច្ចុប្បន្ន។ ក៏ប៉ុន្តែ ទស្សនាវត្តី Science អះអាងថា ជាច្រើនឆ្នាំមកនេះ ក្រុមហ៊ុន ExxonMobil បានព្យាយាមនិយាយជាសាធារណៈ លើកឡើងពីភាពមិនអាចគួរឲ្យទុកចិត្តបាន នៃការព្យាករណ៍វិទ្យាសាស្ត្រទាំងឡាយណា ស្តីពីវិបត្តិអាកាសធាតុ បង្កឡើងដោយឧស្ម័នផ្ទះកញ្ចក់។
លោកអគ្គលេខាធិការអង្គការសហប្រជាជាតិ បានអំពាវនាវ ឲ្យមានការផ្តន្ទាទោស ចំពោះក្រុមហ៊ុនឧស្សាហកម្មប្រេងធ្យូងថ្ម និងឧស្ម័ន ដែលនិយាយកុហកទាំងនេះ ឲ្យដូចករណីក្រុមហ៊ុនផលិតបារី ដែលនិយាយកុហក ថាបារីមិនបង្កឲ្យខូចសុខភាព។ ការលើកឡើងរបស់អគ្គលេខាធិការអង្គការសហប្រជាជាតិនេះ គឺចង់សំដៅទៅលើករណី ដែលកាលពីឆ្នាំ១៩៩៨ ក្រុមហ៊ុនឧស្សាហកម្មផលិតបារីនៅអាមេរិក ត្រូវបានតុលាការផ្តន្ទាទោស ឲ្យបង់ប្រាក់ចំណងជំងឺចិត្តថ្លៃមើលថែសុខភាពអ្នកជក់ ចំនួនសុរប២៤៦ពាន់លានដុល្លារ។
ក្រោយការលើកឡើងរបស់លោកអង់តូនីញូ ហ្គូតទែរស៍ អង្គការដើម្បីសន្ធិសញ្ញាមិនរីកសាយភាពថាមពលហ្វូស៊ីល បានចេញលិខិតប្រកាស អបអរ នឹងអំពាវនាវថា ត្រូវតែបញ្ឈប់ឲ្យបាននូវវប្បធម៌និយាយកុហកបោកប្រាស់ របស់ឧស្សាហកម្មប្រភពថាមពហ្វូស៊ីល។ អង្គការនេះ បានអះអាង ជាច្រើនទសវត្សមកនេះ ពិភពលោកបានដើរយឺតយ៉ាវខ្លាំង ក្នុងការចាត់វិធានការទប់ស្កាត់ការកើនឡើងកំដៅផែនដី គឺដោយសារក្រុមឡុបប៊ី បម្រើឲ្យឧស្សាហកម្មប្រេង ដែលជាអ្នកដាក់ឧបសគ្គអូសទាញ យកជើងរាទឹក៕
ប្រភពព័ត៌មាន៖ វិទ្យុបារាំងអន្តរជាតិ https://www.rfi.fr/kh
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
