នៅថ្ងៃចន្ទទី ២១វិច្ឆិកា២០២២ កាតាបានប្រកាសចុះកិច្ចព្រមព្រៀង ផ្គត់ផ្គង់ឧស្ម័នរាវធម្មជាតិដល់ចិន សម្រាប់រយៈពេល២៧ឆ្នាំ។ បើតាមកាតា នេះជាកិច្ចសន្យា រយៈពេលវែងបំផុត លើកទីមួយក្នុងប្រវត្តិឧស្សាហកម្មថាមពលឧស្ម័នធម្មជាតិ។ ដំណឹងនេះធ្លាក់មកចំពេលពិភពលោកកំពុងមានវិបត្តិថាមពលបង្កឡើងដោយសង្គ្រាមនៅអ៊ុយក្រែន និងក្នុងពេលដែលអឺរ៉ុបកំពុងស្វះស្វែងរកជម្រើសថាមពលថ្មីមកជំនួសថាមពលរបស់រុស្ស៊ី។
អឺរ៉ុបប្រឹងប្រែងខ្លាំងណាស់ដែរតែមិនសម្រេច ព្រោះការចរចាជួបភាពស្មុគស្មាញខ្លាំង ហើយប្រទេសខ្លះមានជាអាទិ៍អាល្លឺម៉ង់ បានបដិសេធមិនព្រមចុះកិច្ចសន្យា ដែលមានរយៈពេលវែងទេ។ តែចិនព្រម !
ដូច្នេះក្រុមហ៊ុនថាមពលរបស់រាជាណាចក្រប្រេងកាតា បានជ្រើសរើសចុះកិច្ចសន្យា នាំចេញឧស្ម័នធម្មជាតិរាវ GNL ចំនួន៤ពាន់លានតោន ក្នុងមួយឆ្នាំៗ បូមពីគម្រោងថ្មី គឺអណ្តូងឧស្ម័ន North Field East ទៅឱ្យក្រុមហ៊ុនចិនSinopec សម្រាប់រយៈពេល២៧ឆ្នាំ។ នេះបើតាមសេចក្តីប្រកាសរបស់រដ្ឋមន្ត្រីក្រសួងថាមពលកាតា Saad Sherida Al-Kaabi ដោយលើកសរសើរថា នេះជាកិច្ចព្រមព្រៀងដ៏វែងជាងគេបំផុតក្នុងប្រវត្តិឧស្សាហកម្មឧស្ម័នរាវធម្មជាតិ។ ចំណែកប្រធានក្រុមហ៊ុនថាមពលស៊ីណូប៉ិចចិន បានថ្លែងអបអរតាមអនឡាញពីប៉េកាំងមកថាជាកិច្ចព្រមព្រៀង ជាប្រវត្តិសាស្ត្រ រវាងកាតាអ្នកផ្គត់ផ្គង់ដ៏សំខាន់ជាងគេនៅលើលោក និងចិនអ្នកនាំចូលឧស្ម័នធម្មជាតិរាវដ៏ធំបង្អស់នៅលើផែនដី។
ជាប្រទេសផលិតឧស្ម័នរាវធម្មជាតិដ៏ចំបងមួយនៅពិភពលោក ដូចសហរដ្ឋអាមេរិកនិងអូស្ត្រាលី កាតាមានអណ្តូងឧស្ម័នរាវធម្មជាតិដ៏ធំជាងបង្អស់នៅលើពិភពលោក ដែលចែករំលែកជាមួយនឹងអ៊ីរ៉ង់ គឺ អណ្តូង North Field។ ចែកជាពីរផ្នែក អណ្តូង North Field ដ៏យុទ្ធសាស្ត្រនេះ មានសក្តានុពលបង្កើនផលិតកម្មឧស្ម័នរបស់កាតាឱ្យឡើងបាន៦០% ឬអាចបូមយកឧស្ម័នបានដល់ទៅ១២៦លានតោនក្នុងមួយឆ្នាំៗ នៅឆ្នាំ២០២៧។
សម្រាប់ពេលនេះ ក្រុមហ៊ុន Conocophillips របស់អាមេរិក TotalEnergie បារាំង និង Shell អង់គ្លេស មានចំណែកសំខាន់នៅ North Field ខាងត្បូង កំរិត២៥% និងកាតា៧៥%។ ប៉ុន្តែ Sinopec បានប្រកាសជាផ្លូវការសុំមានចំណែកលើអណ្តូងNorth Field south ដែរ កាលពីខែតុលា២០២១។ ការនេះបានធ្វើឱ្យទំនាក់ទំនងចិនកាតាកាន់តែប្រសើរឡើង។ អាស៊ី (ចិន ជប៉ុន កូរ៉េខាងត្បូង)ជាទីផ្សារឧស្ម័នដ៏ចម្បងរបស់កាតា ហើយទំនាក់ទំនងសេដ្ឋកិច្ចចិនជាមួយក្រុមប្រទេសនៅតំបន់ឈូងសមុទ្ទពែក្សដែលល្អស្រាប់ ត្រូវបានពង្រឹងកាន់ខ្លាំងនារយៈពេលប៉ុន្មានឆ្នាំចុងក្រោយមកនេះ៕
ប្រភពព័ត៌មាន៖ វិទ្យុបារាំងអន្តរជាតិ RFI ៖ https://www.rfi.fr/km
វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា
ទូរស័ព្ទ៖
E-mail : grdp.senatekh@gmail.com
