ចុះផ្សាយថ្ងៃទី២២ ខែកញ្ញា ឆ្នាំ២០២០

តំបន់ព្រៃឡង់ដែលជាជម្រកសត្វព្រៃនិងជាតំបន់អេកូឡូស៊ីធំជាងគេក្នុងអាស៊ាន បាន​លាតសន្ធឹងលើផ្ទៃដីជាង៤៣ម៉ឺន​ហិ​កតា (៤៣១ ៦៨៣ហិ​កតា​) ស្ថិតនៅខេត្ត​ចំនួន៤ រួមមាន ខេត្តក្រចេះ ស្ទឹងត្រែង កំពង់ធំ និង​ព្រះវិហារ ដែលក្នុងនោះមានជីវៈចម្រុះជិត៤០០ប្រភេទកំពុងរស់នៅ។ ក្រោម​កិច្ចសហការ​ជាមួយ​ទីភ្នាក់ងារ​ជំនួយ​សហរដ្ឋអាមេរិក (USAID​) ក្រសួងបរិស្ថាននិង​ក្រសួង​ពាក់ព័ន្ធ​មួយចំនួន​ទៀត បានចាប់ផ្តើមបើក​យុទ្ធនាការ​ការពារ​តំបន់​ព្រៃ​ឡង់ក្រោម​ប្រធានបទ «យុទ្ធនាការ​ផ្លាស់​ប្តូរ​ឥរិយាបថ​សង្គម ដើម្បី​លើកកម្ពស់ និង​អភិរក្ស​ទ្រទ្រង់​ជីវៈ​ចម្រុះ ការពារ​ការ​កាប់​បំផ្លាញ​ព្រៃឈើ​ឱ្យ​កាន់តែ​ប្រសើរ និង​គ្រប់គ្រង​ធនធាន​ធម្មជាតិ​ប្រកបដោយ​ចីរភាព» ដើម្បី​អភិរក្ស​ព្រៃឈើ សត្វព្រៃ និង​ទ្រទ្រង់​ជី​វៈចម្រុះ​នៅ​តំបន់ការពារធម្មជាតិ​ព្រៃ​ឡង់។ យោង​តាម​របាយការណ៍​របស់​បណ្តាញ​យុវជន​កម្ពុជា និង​អង្គការ Jesuit Service Cambodia (JSC​) បាន​បង្ហាញថា ក្នុងរយៈពេល​ប្រមាណ២០ឆ្នាំ​ចុងក្រោយ​នេះ ព្រៃឈើ​ក្នុង​តំបន់​ព្រៃ​ឡង់​ជាង១០ម៉ឺន​ហិ​កតា បាន​ក្លាយជា​វាលរហោឋាន និង​កន្លែង​ខ្លះ​បាន​ក្លាយទៅជា​ចម្ការ​ជំនួស​វិញ។ គិត​ត្រឹម​ឆ្នាំ២០១៩ ផ្ទៃដី៥៨ ១៣៨ហិ​កតាដែល​បាន​មក​ពី​ការបាត់បង់​ព្រៃឈើ​ជាង​១០ម៉ឺន​ហិ​កតា ត្រូវ​បា​នបំប្លែង​ទៅជា​ដីចម្ការ​​ដំណាំ ខណៈ​ផ្ទៃដី​ចំនួន១ ១១១​ហិ​កតា ត្រូវ​បាន​ដុះឡើង​វិញ​ដោយ​ធម្មជាតិ និង​ការ​ដាំដុះ​ដោយ​កម្មវិធី​​ដាំ​ដើមឈើ។ ព្រៃឡង់​បាន​ និង​កំពុង​ទទួលរងនូវបញ្ហាប្រឈមជាច្រើន ដូចជា ការកាប់ទន្រ្ទានដីធ្លី ការរុករករ៉ែ និងគម្រោងអភិវឌ្ឍន៍នានា​ក្នុងការផ្ដល់ដីសម្បទានសេដ្ឋកិច្ចដល់​ក្រុមហ៊ុនធំៗ។ ដកស្រង់ដោយ៖ ការិ. ស្រាវជ្រាវកិច្ចការបរិស្ថាន  ប្រភពព័ត៌មាន៖ គេហទំព័រសារព័ត៌មានវីអូឌី https://vodkhmer.news/2020/09/22/preay-lang-protection-campaign-by-cambodia-america-government/