ក្រសួងសុខាភិបាលកែប្រែវិធានការ ដោយលើកលែងការយកថ្លៃសេវាធ្វើតេស្តកូវីដលើកទី១ និងលើកទី២ ចំពោះមន្ត្រីការទូត និង​មន្ត្រី​អង្គការ​អន្តរជាតិ​កាន់​ទិដ្ឋាការ​ប្រភេទ A ​និង​ប្រភេទ B។ ការសម្រេចបែបនេះ គឺយោងទៅលើគោលការណ៍មនុស្សធម៌  កិច្ចសហប្រតិបត្តិការអន្តរជាតិ និងដោយសារអ្នកកាន់ទិដ្ឋាការប្រភេទ A និង B មិនមានចំនួនច្រើននោះទេ។ ជាទូទៅអ្នកដំណើរជាជនបរទេសត្រូវចំណាយ ១០៥ ដុល្លារសម្រាប់ការធ្វើតេស្តលើកទី១ រួមផ្សំនឹងថ្លៃដឹកជញ្ជូនបន្ថែមទៀត។ កាលពី​ថ្ងៃទី​ ៤ ​កក្កដា ក្រសួង​សុខាភិបាល​ក៏បាន​សម្រេច​កែសម្រួល​វិធានការ​ចំពោះ​​ជនបរទេសដែល​ជា​វិនិយោគិន ធុរជន បុគ្គលិក​ក្រុមហ៊ុន អ្នកជំនាញការ កម្មករ​ជំនាញ​អ្នកបច្ចេកទេស និង​ក្រុមគ្រួសារ​ ដោយ​ឱ្យ​ពួកគេ​តម្កល់​ប្រាក់​​មកនៅត្រឹម​ ២​ពាន់​ដុល្លារ​វិញ (កាលពីលើកមុន ៣ពាន់ដុល្លារ)។ ប្រាក់​ទាំងនោះ​សម្រាប់​ចំណាយ​លើ​ថ្លៃ​ស្នាក់នៅ ក្នុង​អំឡុងពេល​រង់ចាំ​ការធ្វើ​តេស្ដ​ជំងឺ​កូវីដ-​១៩ ថ្លៃ​ដឹកជញ្ជូន​ពី​អាកាសយានដ្ឋាន​ទៅ​សណ្ឋាគារ និង​ចំណាយ​អំឡុងពេល​ធ្វើ​ចត្តាឡីស័ក​។ រៀបរៀងដោយ៖ ការិ. ស្រាវជ្រាវកិច្ចការអភិបាលកិច្ច ប្រភពព័ត៌មាន៖ គេហទំព័រសារព័ត៌មានភ្នំពេញប៉ុស្តិ៍ https://www.postkhmer.com