banner1
ច្បាប់​គ្រប់គ្រង​បច្ចេកវិទ្យា ​បញ្ញា​សិប្បនិម្មិត​អឺរ៉ុប ចូល​ជា​ធរមាន

 3-កុម្ភៈ-2025

ច្បាប់​ស្តី​ពី ​បច្ចេកវិទ្យា​បញ្ញាសិប្បនិម្មិត​ ប្រកបដោយ​មហិច្ឆតា​បំផុត​របស់​សហភាព​អឺរ៉ុប បាន​ចូល​ជា​ធរមាន​នៅថ្ងៃ​អាទិត្យ​ ទី​២ កុម្ភៈ​ ២០២៥​នេះ។ ប៉ុន្តែ​គេ​ទំនង​ជា​អាច​បន្ត​ជជែក​វែក​ញែក ឬ​តវ៉ា​ប្រឆាំង​នឹង​ច្បាប់​នេះ​បាន​ទៀត ជា​ពិសេស​នា​ឱកាស​ជំនួប​កំពូល​ក្រុង​ប៉ារីស​ស្តីពី​ បញ្ញាសិប្បនិម្មិត​ ដែល​នឹង​ប្រព្រឹត្ត​ទៅ​នៅ​ថ្ងៃទី​១០-១១​កុម្ភៈ ​២០២៥ ខាង​មុខ។  ច្បាប់​គ្រប់គ្រង​បច្ចេកវិទ្យា​បញ្ញា​សិប្បនិម្មិត​អឺរ៉ុប​ចូល​ជា​ធរមាន​ © CC0 Pixabay/Gerd Altmann

នៅ​មួយ​សប្តាហ៍​មុន​ការ​បើក​ជំនួប​កំពូល​ស្តី​ពី​បញ្ញាសិប្បនិម្មិត ​នៅក្រុង​ប៉ារីស ច្បាប់​គ្រប់គ្រង​បច្ចេកវិទ្យា​បញ្ញាសិប្បនិម្មិតរបស់​សហភាព​​អឺរ៉ុប AI Act ផ្នែក​ទី​មួយ បាន​ចូល​ជា​ធរមាន​ នៅ​ថ្ងៃ​អាទិត្យ ​ទី​២​ កុម្ភៈ​ ២០២៥​នេះ​ទៅ។ ដូច្នេះ ចាប់​ពី​ពេល​​​នេះ​តទៅ អឺរ៉ុប​មិន​អនុញ្ញាត​ឱ្យ​​ប្រើប្រាស់​ប្រព័ន្ធ​បញ្ញាសិប្បនិម្មិត​បែប​គ្រោះ​ថ្នាក់​ខ្លាំង ដូច​ជា​កម្មវិធី​ដាក់​ពិន្ទុ​​សង្គម​ជា​លក្ខណៈ​ឯកជន ​ឬ​សាធារណៈ​ដូច​នៅ​ចិន​ ឬ​កម្មវិធី​ប៉ូលិស​វែក​រក​មុខ​ សម្គាល់​​មនុស្ស​ប្រព្រឹត្ត​បទ​ល្មើសទេ។ កម្មវិធីសម្គាល់​អារម្មណ៍ វិភាគ​អត្តចរិត​បុគ្គលិក ឬ​សិស្ស ​​នៅ​កន្លែង​ធ្វើការ​ ឬ​នៅ​សាលា​ ក៏​មាន​​ចែងហាមឃាត់​​ក្នុង​ផ្នែក​ទីមួយ​នៃច្បាប់​​ Ai Act របស់​អឺរ៉ុប​ដែរ។​

បើ​តាមការ​លម្អិត​របស់​គណៈកម្មការ​អឺរ៉ុប​ ច្បាប់​គ្រប់គ្រង​បញ្ញាសិប្បនិម្មិត​អឺរ៉ុប មិន​អនុញ្ញាត​ឱ្យប្រើ​កម្មវិធី ​Ai​ កេង​​ចំណេញ​លើ​​បុគ្គល​ទន់​ខ្សោយ​ទេ។ ការ​កំណត់​អត្តសញ្ញាណ​មនុស្ស​តាម​រយៈ​បច្ចេកវិទ្យា​ថត​មុខ​ ថត​​ក្រយៅ​ ដោយ​ផ្ទាល់​តាម​ទី​សាធារណៈ​ ដើម្បី​បាន​ដឹង​ ពី​ពូជ​ ពី​ទស្សនៈ​នយោបាយ-សាសនា ពី​ទិន្ននាការ​ផ្នែក​ផ្លូវ​ភេទ ត្រូវ​ហាមឃាត់​ជា​ផ្លូវ​ការ​ចាប់​ពី​ថ្ងៃ​ច្បាប់​ចូល​ជា​ធរមាន​នេះ​ទៅ។ សហភាពអឺរ៉ុប​នឹង​​ដាក់​ទណ្ឌកម្ម​ក្រុមហ៊ុន​ល្មើស​នឹង​ការ​ហាមឃាត់​ដោយ​ពិន័យ​រហូត​ដល់​៧%​នៃ​ប្រាក់​ចំណូល​របស់​ក្រុមហ៊ុន។

ផ្នែកផ្សេង​ទៀត​នៃ​ច្បាប់ មាន​ជាអាទិ៍​ផ្នែក​ទាក់ទង​នឹង​ការ​ប្រើប្រាស់​បញ្ញាសិប្បនិម្មិត​ជា​ទូទៅ ​​នឹង​ចាប់​អនុវត្ត​ជា​បន្ត​បន្ទាប់ ជា​ដំណាក់ៗ និង​ចូល​ជា​ធរមានទាំង​ស្រុង​​​ យ៉ាង​យូរ​ត្រឹម​ថ្ងៃទី​១​ សីហា ​២០២៥។

ក៏​ប៉ុន្តែ​ច្បាប់​អឺរ៉ុប​ត្រូវ​ប្រឈម​នឹង​ឧបសគ្គ​ជា​ច្រើន​ទៀត​ណាស់។ ​សម្រាប់​ពេល​នេះ ច្បាប់​បញ្ញាសិប្បនិម្មិត​អឺរ៉ុប​នៅ​តែ​ប្រធានបទ​​នៃ​ការ​ជជែក​តស៊ូ​មតិ និង​ការ​​តវ៉ា​ប្រឆាំង​បាន​ជា​និច្ច។ ចំណោទ​ជា​ច្រើន​អាច​នឹង​លើក​មក​លម្អិត​ ក្នុងជំនួប​កំពូល​ក្រុង​ប៉ារីស ស្តីពី​បញ្ញា​សិប្បនិម្មិត​ ដែលនឹង​ប្រព្រឹត្ត​ទៅ​នៅ​​ថ្ងៃទី​១០-១១​ កុម្ភៈ​ ២០២៥ សប្តាហ៍​ក្រោយ។ ជំនួ​បកំពូល​ផ្តួច​ផ្តើម​ដោយ​ប្រធានាធិបតី​បារាំង រង់ចាំ​ទទួល​ប្រមុខ​រដ្ឋ​ រដ្ឋាភិបាល​ជាង​មួយ​ប្រទេស រួម​មាន​ប្រធានាធិបតី​អាមេរិក ចិន​ ព្រមទាំង​តំណាង​សង្គម​ស៊ីវិល​ ប្រធាន​ក្រុមហ៊ុន​យក្ស​ផ្នែក​បញ្ញាសិប្បនិម្មិតជា​ច្រើន​ ដូច​ជា​ OpenAi Google…ជា​ពិសេស​ទៅ​ទៀត អឺរ៉ុប​អាចមាន​​ហានិភ័យ​​ប្រឈម​នឹងសម្ពាធ​របស់​ក្រុមហ៊ុន​យក្ស​ផ្នែក​បច្ចេកវិទ្យា​បញ្ញាសិប្បនិម្មិត​អាមេរិក ដែល​បាន​ទទួល​ការ​គាំទ្រ​យ៉ាង​ពេញ​ទំហឹង​ពី​ប្រធានាធិបតី​ដូណាល់ត្រាំ។ ​លោក ត្រាំ​ បាន​សន្យា​ការពារ​ក្រុមហ៊ុន​បច្ចេកវិទ្យា​ទំនើប​អាមេរិក ពីការ​ពិន័យ​តាម​ច្បាប់​ជា​ធរមានរបស់​​អឺរ៉ុបផង៕

ប្រភពព័ត៌មាន​​ ៖ វិទ្យុបារាំងអន្តរជាតិ RFI www.rfi.fr/kh


អត្ថបទពាក់ព័ន្ធ

   អត្ថបទថ្មី
ទំនាក់ទំនង

វិមានរដ្ឋចំការមន មហាវិថីព្រះនរោត្តម រាជធានីភ្នំពេញ ព្រះរាជាណាចក្រកម្ពុជា

ទូរស័ព្ទ៖

E-mail : grdp.senatekh@gmail.com

ឯកសារសំខាន់ៗ

ចំនួនឯកសារ

ឯកសារស្រាវជ្រាវ : 35
ឯកសារគោលនយោបាយ : 135
ឯកសារពិគ្រោះ : 444
ឯកសារច្បាប់ : 161
ចំនួនអ្នកទស្សនា


សំលេង
វីដេអូខ្លីៗ
សៀវភៅថ្មីៗ
រៀបចំគេហទំព័រដោយ៖ នាយកដ្ឋានព័ត៌មានវិទ្យា